Ein annder grien
Item samle den harn, von gesunden manen vnnd knaben die wein trincken, deck den wol zu, laß In ein monat oder lenger steen vnnd wenn du ferben wilt, so nem des harns, souil du sein bedarffest, Inn ein neuen hafen, laß in wol verscheimen, so daz geschehen so nem des harns 1 pfund vnd 4 lot lab, die wol gestossen ist, vnnd ruere den langsam In die laugen, laß sieden so lang wie fisch vnd ruers alleweil, dan thu ein lot alaun Alaun darein, seuchs aber Zuuor durch ein tuch in ein sauber gefeß Die fell sollen aber zuuor gepaisst sein In alaun wasser, das es durchgang vnnd geschwelt werd, vnd danoch noch feucht seindt, Inndem prait sie auff ein pret, oder saubern estrich, vnd nym ein baumwollen wisch, stoß den Inn die farb vnnd mach die fel wol naß, vnnd bestreiche sie gleich, Darnach nee die feel neben vnd vnden zusamen, vnnd thu die varb bey dem hals darein, dan neme das fel vnden vnd oben In bede hend, vnnd schengks hin vnd her, so vahend sie die farb, vnd nemen der farb nit mer an dan sie bederffen, darnach hencks an lufft, laß trucken werden, vnd sie werden nicht hert, Darnach nem gesaltzen wasser oder essich, damit bestreich die fel mit eim wullen tuch zu allen orten, so wider legen sie sich, darnach lege sie nach der lenge zusamen, vnd die farb hinein, Alßdann lege sie Inn ein Keler, So werden sie pluen vnnd grienfarb, dar darnach bestreiche sie mit einem wullen tuch.