Ain annders
Nym 6 vnntzen alaun defeta, 4 vntz tartarj crudj 2 vntz alaun, 1/2 quint Campffer 1/2 quintlin sanguis draconis, reibs alles fast klain zusamen, Darnach nem 6 vnntzen ochsen galln vnd 6 peckelin vol lauters wassers, dise ding alle thu in ein kessel, laß daran ein driteil einsieden, nachdem seyhe es durch ein tuch, so du aber die gallen vnnd den kampffer nit gehaben magst, so ist das wasser doch sunst starck genug, vnnd so du es prauchen wilt, so nem ein wullen neuen lapen, netze den Inn dem wasser, darmit reibe die flecken, vnnd wan die feuchtigkait auß dem lappen kompt, so netze in wider, vnnd reib die flecken also damit bis sie vergendt, darnach nem warm wasser vnnd wasch den ort des mackels damit, Aber zum weissen tuch nem auch des wassers vnd ein wenig saiffen disteliers, dann thu Im wie obstat.