Hie nach stad wel varwen man Riben sol oder nit riben Das sÿ ir varwe behabbent
zuo dem Ersten von dem blowen
Man sol an kein blow riben wen An lein fin lasur Won alles ander blow verlùret sinen bloumen So man es ribet Das blow daz man riben wil daz sol man riben mit luterem wasser und man sol es den flötzen mit eim liechten löublin In 2 muschelen recht schoen und temperieren den mit starchen gumi arabicum wasser und dar under ein oder 2 tropffen honges oder zucker kandit Als gros as ein erbs Und nimd den ein wenig tragant Und tuo es ouch dar In wiltu daz blow liecht han So nim blÿwis und mische es dar under In dem riben