Wie man glat rot sùden tücher alt wider nùwe verwen und bereitten sol
Item wiltu ein alt siden tuoch wider bringen so nimm daz alt sÿden tuoch Und alun also vorhin Hie merck daz alle alten sÿden tücher die du wider verwen wilt sÿ sigent mit gold gesprenget oder nit Die soltu vorhin allunen Also hie nach stat geschriben Nim alun und zerstos den recht clein und schùte dar ùber wasser Und sol daz wasser sieden heis sin und los den allun dar in zergan und wenne es gerat lewe werden So nim din tuoch und stos ess In ein teil lougen und knöre es in den warmwen lewen allun wasser recht wol und schùtte daz wasser us und gùsse frisch allun wasser und warm dar ùber Und tuo Im aber also do vor Und tripp dis so lange bitz daz du wol siest daz schön da von gat Und nit me unsuberkeit So las es den trucken werden an dem luft Und nit an der sunnen Du solt kein sÿden tuoch anderst trùcken den an dem luft Und nit an der sunnen Und wenne du din tuoch Also wol geweschen und geallunt hest Wiltu ess den wider rot verwen So nim presilgen und sùt die mit wasser uf halb in und las es erkalten Und nim den din tuoch und zùhe es den durch die varwe ii oder iii mal und hencke es den uf Und las es trucken werden an dem luft So wird es wider also ob es wider nùwe sÿge