Von saf grün
Wit daz nù daz saff grün also guot und Also nùtze ist zuo schetwen uf vil varwen und man ouch wol mag mit verwen schöne grüne garn und ouch grün leder So wil ich hie leren wie mans machen sol schöne und ouch fin daz man x jar oder lenger sÿ trochen behalten mag
Item in dem herbst monet so der win zitig ist So vindet man swartze ber feile die heissent wechelber oder tintenber der ber sol man nemen Also vil man wil ein becher fol oder me und sol die zertrucken und zerbrechen in einem geschirre und sol daz saf wal us den beren tringen durch ein rein starck linin tuoch und tuo daz saf in ein nùwen haffen und gùs wol ein halb mass wasser dar in und la daz erwallen ane rouch und wenne es wol erwallet ist So tuo ii lot alunes in die varwe und lo es erwallen mit dem allun und la den die varwe wol kalt werden und gùs die varwe in ein rinderin blattren und hencke die varwe in der blatren uf an dem luft So wirt die varwe herte und dùre in der blatren und ouch trocken gnuog in eim monat und wirt zuo glicher wise also substantz da man tinten von sùdet Und Also man mag die varwe trocken und herte behalten wie lang man wil daz dissi varwe ir kraft niemer verlùret An disen weg und wennen disse varwe wil bruchen zuo schetwen oder zuo andern dingen Als do vor ist geseid So nim der varwe ein wenig us der blatren und leg sÿ in ein rein geschirre Und gùs luter wasser darùber und las daz ein wenig weichen So zergat die varwe und ist schön fin saf grün Und temperiere daz weder zuo dicke noch zuo dùnne So wirt im rech zuo allen dingen und dis heisß fin saf gruon