Hie nach von öl varw
Item hie wil ich leren wie man Alle varwe mit öl temperieren sol Und zuo ersten wie man daz öl dar zuo bereit sol das es luter werde (addition) und ouch dester gerne balde trocken werd Man sol nemen linsat ölei oder hanf sam oelei oder alt nus ölei als vil man wil und dar In legen las wol gebrant wis bein Und ouch as vil pinses und dis in dem ölei lan erwallen und wirf den schum obben ab dem öl und setze es ab dem fùrre Und la es wol erkuoglen und ist daz öle wol ein mase So leg ii lot calixsten stein in daz öle und so zergat er In dem warmen öli und wirt gar luter und clare Dar nach so sige daz öle durch ein rein linin tuoch In ein beckin und setze daz becki mit dem öl an die sungen iiii tag so wirt daz öle dick und ouch luter und das öle das trucket gar bald und machet al varwen schön luter und auch glantz und wen dis öl asso guot ist So heisß es oleum preciosum und mit disem ölei sol man alle varwen riben Und ouch temperieren alle varwen in der ticki als ein haberbri weder zuo dicke noch zuo dinne sÿ Dis sint die varwen die man mit ölei temperieren sol Zuo dem ersten Zinober Minie, Paris rot, Röslecht rot Slecht blaw lasur, Endich, und ouch swartz, opperment gel Ruschgel, veger, Antlitz brunrot Saft grün, Endich grüne und bliwis und nùd me sol man mit oleÿ temperieren