Wiltu ein schöne lip varwe machen zuo Jungen lùtten

Wiltu ein schöne lip varwe machen zuo Jungen lùtten
So nim ein wenig zinober und ouch als vil mingen Und aller minst parres rott und mische dar under der merer teil bliwis und temperiere das alles wol under einander daz die lip varwe weder zuo rot noch zuo blecke sÿ und denn ist si ze rot so mische me bliwis dar under untz daz der varwen reht werde Daruf sol man schetwen mit zenober da ein wenig vegers und mingen under gemischet sÿ Und schetwe die anlit und hende und do das bilde nackent sÿ Man sol die ougen und die nasen uss strichen und die hende mit brunrot da ein wenig ruosses under gemischet sÿ Und die sternling in den ougen sol man mit endich anstrichen da ein wenig span grün under gemischet si