Von meister rotalt von lamperten ein seife zuo brùnen on arbeit Und sÿ ouch nit felen mag
Wiltu ein seipfen machen on erbeit So nim bonen stengel und die hùlssen von den bonen und win stein und galicien stein Und brenne dar us ein esche Daz du habest uf ix liber der selben eschen dar nach so recipe weit esche die wol gebrant sÿ uff iii liber oder iiii und tuo sÿ under disse vorder esche Und tuo sÿ alle in ein geschirre und schùtte dar ùber luter wasser und rüre es under einander Und lo es stan viii tag Dar nach so gùsse ein loug dar us und nim den die lougen und gùsse sÿ noch ein mol Des wasser sol as uil sin also der eschen Zuo ieglichem liber ein moß wasser Dar nach so nim scheffen unslot und zerschind daz clein und lege es in die lougen und losse es ligen x dag Ouch so sol des unslots noch halb so uil sin also der eschen und der lougen daz ist zuo ieder mosse lougen und 4 liber eschen sol tu nemen 1 1/2 liber und i fierling Und wenne daz unslit also x tag gestanden ist in de lougen So tuo es in einen kessel und losse es miteinander brùngen xii stund Dar nach so nim iii halb fiergling sal Armoniacum und rüre daz in den kessel und lo es sùden Und brùnen einen grossen wal ist denne der louge me in dem kessel so sÿge sÿ ab Und gùs die seipfe in ein geschir daz vol kaltes wasser sÿ Darnach so sint sÿ und zeichen sÿ und leg sÿ den an dem luft daz sÿ trucken werd So ist sÿ bereit Und ist disse seipf dùr gerecht ist Etliche die machent die lougen von kalg und brennent seipffe usser schmaltz und hundes treck und luter saltz darunder dis ist besser