Von dem grossen golt grunt Und ander golt grùntt Zuo sagen Das vindest du hie nachstan Item zuo dem grossen golt grund So nim geriben kriden und ribe die noch einist uf eim rib stein mit eÿger clor Und so der clar fùler ist so er besser ist und rib es recht wol und nim den polum armenium der vorhin wol gestossen sÿ und ribe in under die kriden recht wol Also vil daz es rot werde und recipe ein tropffen hung und tuo in ouch dar in und rib daz alles zuo samen recht wol bitz daz du siechst daz es uf dem nagel gnuog hatt Und will er sich blettren So nim ein wenig orschmer und tuo es dar in und rib es dar under Und nim den ein suber hörnlin und tuo daz alles dar in und rüre es also einen zenober mit einem höltzlin und temperiere den in dem hörnlin mit dem eÿger clor In der dùnne als eÿger clor oder zenober das es gern usser federen gang und deck sÿ fùr den stoub