No title (REC:3622)

Wie man den golt grunt uf tragen sol und wie man vergùlden soll
Wie man vergùlden sol So sol man Nemen daz berment oder daz bappir dar uf man den vergùlden wil und sol den dar uf rissen oder anwerffen was man den vergùlden oder molen wil und sol dar nach nemen ein rinden brotz und ùber faren daz berment domit daz der kalg oder die kride us gang Darnach so nim ein ros zan und lege forhin under daz berment ein buschin bratlin und brunier den daz berment mit dem roß zan An der stat do man vergùlden oder molen wil Daz die har an dem berment sich nider legent und recipe den denn golt grunt Und temperiere in daz er us der federen gang Und lege in den uf mit einer federen glich und gantz und nit zuo dich noch zuo dùnne und lo in trucken werden und nit an der sunen noch nit uf den offen Er sol von im selbs trucken werden Und wen der grund bitz uf den kernen und gantz trucket ist So recipe den daz gold und schind es uf eim kùssi und recipe den daz busch bretli und lege ess aber under daz berment An die stat da du vergùlden wit und nim den daz gold mit dem zenglin und lege es uf den golt grund und recipe den denn zan und brunier hùbschlichen zuo dem ersten Daz golt uf dem grund haffte Darnach so brunier es gantz daz das golt fin und schön werde und recipe den ein Nùs rein tüchlin und wùsche das gold gantz domit und brunier es noch ein mol recht wol mit dem zan So wirt es fin schön glantz Und vergùldet schön und ouch hùpsch und guott