Item wiltu machen eyn gut assis gult und syluer drucken uff zo legen uff perment und ouch uff alle ander ferben und machs damit schryuen ader florieren und musieren mit der federen ader pensel wie kleyn du wilt und dar in ouch drucken vergulden gar glantz So nym gummi armoniacum und terpentinam aloepacicum und galbanum und zucker iecklichs als grois als eyne erbes und sal nemen gebranter kryden also vil als der vurgenanten matiergen zo sament is und wigen die kryde Intgen die materge und dit alles riff gar wal under eyn ander mit wasser und ouch dar under lapis ematicis und cnober und gebrant auripigmentum und iecklichs also grois als eyn erweisz und riff dit alles gar wal under eyn ander mit wasser und temperiere dat mit eyer clair dat dat dritte deil wasser sy und gemischet und temperier it weder zo dick noch zo dunne dat it usz der federen gerincklich ge ader usz dem pensel und due dat in eyn muschel und wat man da mit schrybet uff permeint ader uff ander gestrichen varben dat sal man wal drucken layssen werden und sal is dan dan brunieren mit eyme wulfs zande gar senftlichen und sal dar na dat gult dar in parnieren mit dem zande und riff is dar na mit baumwullen ober ale so schynt dat gult gar schoyn licht und is ouch der aller beste synne drucken zo vergulden und macht ouch dat aller beste glantz