Item van golde zo schryuen usz der federen
Item wiltu gult ader syluer usz der federen schryuen So nym in der aptiecken baubiten winauam ader nym barillen cristallen und riff welches du wilt uff eyme steyne mit luterem wasser gar kleyn also lange als man zinober ribet und temperier dat mit dem vurgenanten wasser van gummen und eyren clair und misch dat wasser mit dem dritdeil luter wasser und temperier dat in der dick als zinober und schriff da mit was du wilt gulden ader sylberen machen und wanne die schrift wal drucken wirt so nym eyn guten vyngerlyn ader waß dat van gulde sy und Riff da mit ij ader iij mail ober die schrift bis sy glantzen wirt und nym dan eynen zant und ober fare die schrift da mit so wirt sy glantz So du sy wilt aber uber sylberen so due eme ouch also mit sylber