Item wiltu uff gult dat Irst gebruniert is etwas fremds musieren recht als abe is gepunsineret sy und schynt zo gelicher wisz als abe eyn gult uff dat ander gemacht sy so sal man in der aptiecken nemen campher und dit is dorchluchtich und ouch mastix der da luter sy und sal dese ij ryben uff eyme steyne gar wal under eynander mit wasser dat da luter sy weder zo dunne nach zo dick dat it usz dem pensel ge und macht uff fyn gult wat ir wilt und wanne is drocken wirt so schynet is als abe eyn gult uff dat ander gemacht were //
Der dat selbe gummi armoniacum laist uber nacht lygen in essich und zo get in dem selben essich und wirt wisz als myrre so sal man dan den essich abe sygen und sal ouch dar under ryben eyn wenich gummi van mandelboum und salt die ij gummi under eyn ander mit luterem wasser temperieren und wat da mit gemusiert wirt uff luter gleser geschyre wan dat drucken wirt me dan halff dat it eyn wenich klebet als eyn oley gult varbe so sal man dat glas ober gulden so schynt dat gult dorch und dorch dat glas durchluchtich schoyn und ouch glantz als abe is were pruneret und sal dan mit boumwullen dat oberiche gult aff wuschen Dar na sa man is senftlichen laißen drucken by frischen heissen gluten und sal is langsame laisen heis werden dat dat glas neit in brech dar na sal man dat glas van eme selber laisen wal kolen so blyuet dat gult schoyn uff dem glase und verwandelt sich neit van wasser noch van wyne Dese vurgeschreuen temperierunge is ouch gut zo obergulden uff eynen glaten steyn ader uff ysen und uff alle ander gesmede ader matail und ouch uff helffen beyn Zo gelicher wiß als man dat glas ouerguldet also duet man ouch den anderen so blift it ewich