Wiltu eyn wasser machen da mit man alle varben temperieren sal nach lampertschen sietten dat die farue stait vur ewich bliuet Do nym zom Irsten gummi arbicum ij deil und gummi cerusarum dat dritte deil und zo slach die beide zo kleynen stucken und lege dat dan in eyn schuttel die reyn sy und gus dar ober wasser und lais dat stayn uber nacht weichen und an dem morgen so zo driff it mit dem vynger gar wal und guß me wassers dar an und zo dryff is aber vast under eyn ander Und wanne is an der dicke wirt als oley so tuwe neit me wassers dar in und nym dan also grois hoynchs als ayn hasel nosz under ij loit gummi und zo dryff is wal under eyn ander und misch dar an eyne eyer schall vol wijsz wijns und menge is under eyn ander und syge is darnoch dorch eyn lynen doich und behalt dit wasser in eyme glas verstuppet bis du syn gebruchen wlt