Item Wiltu eyn wasser machen da mit man dat lasur temppereirt so nym gûm arbico i loit und brich dat cleyn und so legit dat in vasser und nym halff also vil gumme amygda Und zo laisz dat besunder und rib dat uff eyme steyn und also vil hoynchs als eyn gefuege bone und temperier dat alles under eyn ander myt wasser Dat it also dicke sy als oley dar na syhe it dorch eyn lynen doch Und behalt it in eyn glasz und temperier dat lasuyr da mit und doe als groisz wysser myren dar in die luter sy als eyn erweis und laisz it vergaen so is it guet Wiltu aber mircken wanne it recht sy so rore dat lasuyr under eyn ander und lais it eyn wile staen fellet it dan balde zo grûnde so is it zo swach blyft it aber lange bla so is it gût Item man sal die myre in dat lasûyr doyn und da in laisen zo gaen