Item swartz garn zo ferben und zo setzen
Item nym eyn kessel myt wasser drÿ ader iiij eymer und henck in uff das fùre das is woil syed und in den soed so schudt eyn sester klÿen dar zü und nyt in roir isz und laisz isz sieden mit den klyen bis die klyen unden fallen und wan is woil gesoden is so heb is vam fùr und lais is kalt werden wan die klien woil zo grùnd gesuncken isz so schùt das wasser hobschlich ab in eyn sùnder geschyrr und nemt dan irlyn rynden ader de scheltzen Dar van und legt in das wasser in eyn geheb geschir und alt rostig ysen so vil ir kont so me so besser und stobt Dis hart zo Das keyn lopft Dar by ge und setz in den keller Disz farb solt ir setzen im mey wan das irlyn holtz im sapft is und ie ober iij Dag myt eym stebgen roren dan gert sy wie eyn sitt farb und is mois eyn wochen ader iiij stan ee man mit farb wan dù uil garn ader doch farben wilt saltù nemen gall oppel und salt sy nit zo kleyn stoszen und in eyn seckelgyn don und eyn kessel mit wasser ober den hert hencken Darna dù vil ader wenich wilt ferben und dz seckelgyn mit den gall oppeln daryn doyn und laisz is woil sieden dz die brù rodich werd so isz roder wirt so besszer ist zo eyner ellen dochs nym eyn loit gall oppel Dar na wan is woil gesoden isz so heb den kessel vam fùr und nym das garn ader doch und stosz is in den kessel und lasz is eyn vr dar yn ligen und nym dan der iszen farben in eyn ander geschir und nym das garn ader doch usz dem gall appel und zwynck is usz nit zo hart und stois is in die iszen farb und laisz is uch eyn wenich dar in ligen und nym isz Dan weder usz und zwynck is usz und henck isz uff und nit in die sonne und lasz isz drùcken und dùe isz dan weder in den gall appel und lasz is weder daruff drucken werden und stosz is dan weder in die iszen farb und weder dan drucken werde und dùe so dick bis is swartz genoch wirt usz eyner ferben in die ander wan is dan uss bereit isz so mach eyn Dùn lym wasser und ziech dz doich ader garn dar dorch und due der iszen farben eyn wenich under das lym wasser dan henck is uff und las dz garn drucken usz ist doch so span isz styff