Van presilien varben
Item wiltu Roeselyn machen so nym presilyen holtz eyn loit ader eyn hals und dat sal gestoissen ader geschaben syn und nym louge die usz eichen ader usz buchen eschen gemacht sy die sal luter und starck syn und sal siedende heis syn dat man kome eynen vynger dar in gelyden moge und gusz sy also heis eyn wenich uber dat holtz in eyn reyn dynck eyns dumen hoe und lais it eyne wile also stayn und wane die lauge weder erkaldet so ruere eyn wenich gereben aluns dar in der alun sal druge gereben werden und rure is mit eyme hultz wal under eyn ander so wirt die roit farb schoyn und dicklecht Dar na syge die farbe dorch eyn Reyn doich und lais sy stayn ober nacht so is die dicke rode alle zo bodem gesessen und die lauge swebet dar ober und die syg hoischlich ouen abe bis uff die dicke roede und nym dan die dicke rode farbe an dem bodem und schoide sy in eynen klumpen kryden so drynckt die kryde die fuchtticheit in sich und blibet die farbe drucken uff der kryden und doe dan die farbe in eyn bus bis du ir darfs