No title (REC:3836)

Item hy mirck welche farben zo houff hoiren eyn uff die ander aff zo setzen
Item zom Irsten saltu uff bla wanne du dat gelacht hais und druge worden is mit eynem spitzen premen Intwerffen welcherley gelouff ader bleder du machen wilt und Darna oberstriche De selbe Intwerffunge mit swartz ader weit bla dat is besser mit eyner federen die weich sy ader mit eyme spitzen pensel und darna nemet der dunckeler farben in den pensel allet Ie dunner und strichet da mit an den umbslegen unde her usß also dat sich die dunckel farbe allentzlen verliese uff dem blaen also dat sich de dunckelfarbe und dat blae neit zo gellich underscheyden Dit heist verdunckelt und in dyßer wiß sal man alle ander farben verdunckellen Die man aff setzen wil mit sulcher farben als dan uff deÿ grunt farbe geburt als herna geschreuen steyt Und als dan dat bla alsus verdunckelt is so saltu blywiß mit eynem spitzen pensel alle umb dat verdunckelde strichen und vur uff den umb slegen der bleder saltu mit blywiß allentzelen Ie dunner vort deyllen als vur van dem verdunckelen geschreuen is Dit heist verhauen Und is uff bla lasur
Item uff roissel farbe soilt ir verdunckelen mit gebrantem brun und verheuent mit blywyß
Item licht brun ader lyffarbe saltu uff verdunckelen mit roissel ader gebrant brun und verhebent mit bly wiß
Item aurum mussicum saltu verdunckelen mit brunem und verhoyen mit blywiß
Item zynober saltu verdunckelen mit bruyn und salt it verheuen mit blygel
Item spaynsgroyn saltu verdunckelen mit saff groyn und verhebent mit blygel