Van perlen zo machen
Item wiltu machen die aller liebsten perlen die ye gesehen wurden so nym zo dem Irsten in dem meye so is fast is gedauwet eyn reyn wiß lylach und ganck in eyne wese ader in eynen garten da vil graß in steit Ee die sonne uff gee und spreide dat lylach uff den douwe in dat grasß hyn und her bis it wal naß werde und twynck dan den douwe uß dem lylach gar wal und samen sy also als wil du wilt und lays den dauwe also stayn viij dage in eyme groissen kroge bis er wal luter wirt und syhe dar na den dauwe Dorch eyn lynen doich dat reyn sy in eynnen nuwen reynen hauen und distelliere dan den dauwe Dat uß zwolff maissen komme eyne mais werde und wan der dauwe also bereit wirt und distilieret zo gelicher wiß als man wyn byrnet so is er bereit zo den perlen desen douwe sal man gar wal mit flyß halden in eyme glase und verstopt bis du syn gebruchen wilt Dar na sal man nemen der groissen wissen sylberen muschelen Die man in den tieffen wiheoen vyndet und der nym also vil du wilt und lege sy in eynen kessel und guß starcke lauge dar ober und sut die muschelen gar wal mit der laugen bis dat sich die vysserste rynde abe loyset van den muschelen und ußwendich also schoyn werden als Inwendich und dar na sal man die muschelen gar wal stoißen in eynem erensteyn zo kleynem puluer und sal dat puluer [..]den dorch eyn enge syff und dat puluer behalt gar wal und nym dar na in der apticken eyns glas heisset spageo dat is gar schoyn und luter als perlen dit glas stoys ouch zo puluer als dat irste und die ij behat iecklichs besonder und wan du die perlen wilt machen So nym des Irsten des puluers van den muschelen zweij deil und des anderen van dem glas dat dritte deil und nym dar zo dat vierte deil reyns gemalden symmelmels und wan du des puluers [da]t dryttedel gewinnes und des mels dat virte deil nym dan des vurgenanten wassers eyn deil und gus it [...] dat puluer und knyt dat dar under dat puluer alles under eyn ander bis it wirt also dick als wuldestu eynen leffkochen deich dar uß machen und dar uß mach dan welcherley dynge du wilt grois ader kleyn wie du sy gern haist und wanne du ir also genoich gemacht hais so rige sy alle in eyn messyn seytte und lais sy dan gar wal drucken werden an der sonnen und dar na giff die perlen duben zo essen an dem abende na der vesperen und giff in dan an dem morgen lynßen ader hyrsen zo essen und neit giff in zo dryncken und besluß sy in eyn wyde kebege die eynen gladen bodem habe und lays die duben bis an den funfften dach dar in und soich dan die duben dreck gar wal und stois eyner korp in eyn wasser und wesch die perlen gar wal reyn und lyeß sy dan dar uß und due sy dan in eyn heren duech und ryff sy mit heisser laugen bis dat sy gar wiß und schoyn werdent und dar na due sy dan in eyn reyn kachel die gelasurt sy und guß des vurgenanten dauwes in die kachel ober die perlen eyns vyngers hoe und lais dat wasser erwallen mit den perlen und lais sy dan drucken werden so haistu reyn vyn perlyn die besten die du ye geseges