1487 adì primo mazo. Mi inssigno zentil belin questo ssachetto.
Per adesar l’azuro.
Voiendo adoperar l’azuro tu farai a questo modo. Tu torai l’azuro e da ogno altro cholor che ssia fino per questo primo che è ssopra schrito nui faremo a questo modo. Prima nui toremo tanto cholor quanto volemo adoperar metandolo int’una chapa. E da poi noi toremo uno pocheto, bem pocho, de biaccha e meteremo inssieme. E ssì faremo a questo modo over chon la aqua de goma rabicha, che ssia fina e biancha, e meter inn aqua. Ti vi da lagarla dessfar tanto quanto a vi parerà de poterla adoperar che la no ssia tropo fortte nianche tropo liquida. Overamente adoperar el vovo ben batudo. Da poi batudo el vovo, chon e[l] rosso anche el chiaro, tuo’ una ssponza nova e purgalo mo[l]to bene tanto quanto a ti parerà de poderlo adoperare che no ssia tropo liquido nì tropo forte. Ti medemo tocherai chon do adea ssi la sarà tignente o liquida e tu la intenpererai che la sstia per ssua raxon. E questo ssì è e[l] ssuo chorpo de questo cholor e dei altri.