Pour desgraisser les mabres on y broye de la cendre commune laquelle est bonne apres pour faire la premiere impression dun tableau qui se prepare a huile affin de boucher les fissures et rivers du boys Elle ha plus de corps que la croye et ha certaine graisse On la mesle avelq ladicte croye ou avelq les couleurs ramassees du vaisseau ou lon nettoye les pinceaux elle est desiccative et espargne des couleurs ceste premiere impression faicte sur le boys on racle avelq un costeau pour lunir Apres on y faict une seconde impression de ceruse ou couleurs meslees En un tableau a huile sur toile on ne faict quune impression et la mesme cendre y peult servir Apres ainsy quon ha broye une couleur on y broye de la mie de gros pain pour desgraisser le mabre