MS. 517 Wellcome Historical Medical Library, London. (Braekman 1986) (15th century).
62. Om leder zwart te verwen
Recipe .ii. maten zwarten, .2. loet vitrioels, .4. loet galnoten, dit pulu(er)izeert ende menget mitten zwarten, ende .i. loet olye, dit laet te samen sieden, so is die verwe bereyt, ende dan striicse opt leder mit enen hasen voet .3. of .4. weruen, so lange tot dattet zwart ghenoech is.
66. Om zwart linen doec te verwen
Recipe een tonne vol scorsen of eyken of elsen scillen of basten, ende een ketel vol sliips uten slipsteen, ende een deel hamerslach van yser, ende menget dit totten voirs. laken, dan neemt scoen, claer water, mer regen water is best, ende doet daer in .x. of .xii. scuttel vol zemels, ende laet die een goede wiil zieden, ende oec so moechdi daer in ziede(n) een deel rinde, ende alst een goede wiil ghesoden is, so latet scoen claren of ende cleynset, ende giet dat water op die materie, ende laet dat so staen, ende latet op den bodem bliuen omtrent een hantbreet dick.
Ende dan neemt een heef deech of deysem van roggen deech die zeer suer is, hoe zuerre hoe beter, die een pont weget, ende dan neemt .1. coelsche quartier bier aziins die zuer is, ende mengetten mitten heef deech al cleyn, ende dan so doet een deel daer of op die materie die in die tonne bleef, ende dan weder vanden heefdege daer in, dan so giet dat water daer weder op dat ghi of ghecleynet hebt.
Ende als ghi hier mede verwen wilt, so suldi uwen doec daer in steken, ende trecken wt, ende wringen weder wt, dit suldi so lange doen tot dat zwart ghenoech is, dan suldi nemen een muls dat verwers besigen, ende sieden dat in loge ghemaect van hout assche, ende weet assche, ende ziedent, dan daer in so vergaet hem die roke van der voirs. verwen ende wort noch zwarter. Ende wildi wollen laken hiermede verwen, so selmen esken scorse nemen voer elsen.
Item wat verwen dat ghi dus verwen wilt, dat seldi eerst nat maken in water ghesoden mit aluyn ende mit tarwen zemel.