Illuminierbuoch (1549)
Schwartz kupffer lot (p. 84)
Die glassmolen ryben ein lott, ist falb brun, das ist gar lieblich su bruchen wie das gelütert russ wasser. Item sy machen auch rot lot, das ist gut zu nackender bildung und rotem har.
Schwartze gute farb zemachen. Pfirsichsteinschwarz. (p. 84-85)
Wiltu ein gar zart und lieblich schwarz haben, So nim pfersichtstein, thun die in einen nüwen hafen, thun ein fynen behäben deckel doruff, den verkleib gar wol das kein dampf daruss möge, es würden dir sunst stein zu ytel äschen werden. Den hafen gib einem hafner der brennen will, das er dir den zu andrem gschirr in ofen setz zu brennen. Wann er dann gebrant hatt, so nim den hafen und thun jn uff, so sind die stein kol schwartz. Die zerstoss in eim mörsel gar klein und ryb sy gar lang und wol uff einem stein biss sy nimmen ruch sind. Temperier sy darnach an mit welcher temperatur du wöllest so hastu gar ein schön gut Schwartz. Runschwartz ist jedermann bekant.
Schwartzkutten und Baretlin farb (p. 93)
Nim kien Schwartz ryb das mit eim wenig Endich und plywyss. Temperiers alles wol zusammen. Schattier mit Endich darunder ein wenig paryss root gemischt syg. Erhöchs mit dünnen eschfarb. Dinten dünn angestrychen, verschattier das mit endich oder stattem schwartzem. Erhöchss mit einem dünnen eschferblin.
Schwartze kleydung (p. 107)
Strych papyr shwartz uff gewandt oder Baretlin. Schattier daruff mit sattem endich, darunder satt paryss rot vermischt syg. Erhöchs mit grower farb vermischet mit plywyss. Magst auch schattieren mit Attich ofder Heidelber oder pfirsichstein schwartz.
Schwartz kupffer lot zumachen (p. 112)
Nimm reinen Hammerschlag I lot und I lot kupffer eschen II lot schmeltz glass. Das alles ryb wol durcheinandern, biss dass es gar kein sandige rühe mehr habe. Du solts aber ryben uff eim kupfferen blatt. Temperiers mit gummi wasser. Mit em magstu alle liechte farben verschattieren. Besonders aber wysse farb. Es würd uff wyss gwandt gar lustlich, wann es vermischet ist mit saffran mit plywyss vermischet. (?).
Ein ander schwartz Lot (p. 114)
Nimm kupffer eschen und schmelzglass jedess glych vyl. Rybs gar wol zusammen. Machs an mit gummi wasser.
Von schwarzer gschrift (p. 116)
On dinten ein schwartze gschrift schryben, die man doch nit kan schwartz sehen, man zieh sy dann durch ein wasser. Gstossnen Victriel nim, thun den in ein schroblin, das suber syg, güss frisch luter wasser wenig daran, das der victriel zergang. Dann so nim ein nüw gschnitne fäder und schryb mit dem wasser uff suber papyr und lass es dan wol trocknen das niemands nüt sehen kann uff dem papyr. Wiltu nun jemands ein gschrifft zeygen, da keine ist, so nimm ein viertel einer mass luterss brunnwasser, thu daryn I lot pulverss Galerum, misch es wol durcheinander. Syh es durch ein rein tuch in ein suberss breites becky, nach grösse des brieffs. Züch dann den brieff durch das wasser im becken, so facht sy von stund an schwartz werden, alss ob sy mit dinten geschriben wär.
Von schwartzen brieffen. Ein schwartzen brieff mit wysser gschrifft an tag ze thun. (p. 117)
Nim frisch luter brunn wasser, thun darunder das gäl von eim frischen ey, temperier es wol durch einander in der dicke dass du wol darmit schriben könnest. Nim dann eine nüwe gschnitte fäder und schryb darmitt uffs papyr, was du wilt, un lass es wol ertrocknen. Nim dann ein linden guten pensel un strych den brieff allenthalben mit dinten an, das es alles schwartz würdt, das er niemand lesen kann, lass es trocknen. Wann du jn nun wilt lesslich machen, so leg die brieff nider un schab mit einem messer, die substantz der gschrifft heraber, so ist sy schön wyss und lustig zu lesen in der schwartzen feldierung. Also mag man auch allerhand molen und rüssen. Jst ein gutt stücklin.