Nun folget das Leim
wasser nemlich wie
du den Leim hierzu
sieden vnd bereiten,
solt,
Nim deß hier uorgemachten Law
wassers so von den aichen Spänen,
Sägmäl, oder Rausch gesotten word(en)
(//f.14v)
dor Inn du albereit dz Leinen tuch oder
gewannt zum anderen mol, nemlich
und zu Anfang
ein mol also weist, vnd dz andermol
in der obangesetzten farb ein mahl ein
getuncket hast vnd vßgewunden hast.
(Welches Law wasser gleich schwärtzlich
sein wirt.) ein Kössel vol, vnd thue
dorein, ein gutteil abschnitzlen dz ist
der Lederlin, so die Schuhmacher
vom Leder abgeschnitzlet haben,
hencke den Kössel sampt dem wasser
vnd lederlin über dz feür, vnd laß bej nah
dz wasser an den Abschnitz oder Lederlin
schier gar eindieden, vnd so dz also ge-
(//f. 15r)
schähen, so geüß ein Kübel voll Kalt
bron wasser dorin, so wirt der schmutz
von Lederlin oben vff dem wasser
schwimmen, Den schum mit ainer
Köllen souberab, so souber du Immer
kanst, vnd laß dann dz wasser
wider vff dz Halb vngeuarlich
einsieden, vnd dann den Kessel wider
mit kaltem Wasser zu fillen,
und den Schmutz wider alß vor,
mit ainer Kölln abgeschoumet, vnd
wider mit kaltem bron wasser
Zugefilt, vnd wider sieden lassen,
vnd den schmutz Zu Jedem mal oben
abgeschoumt, vnd so es Kein schmutz
(//f.15v)
mehr gibt, so geüß alß dann diß ge-
sotten Lederwasser durch ein Reinen
Zeinen (dorin Zuuor frisch souber
straw gelegt worden.) so bleiben die
Leder schnipfflin vff dem straw vff
der Zainen, Daß durch gesigen Leder
oder Leim wasser aber dz behalt,
Die gesotten Lederlin aber so vff dem
straw in der Zeinen gefunden, die
Nim, thue sie wider in den Kössel, vnd
geüß wider ein frisch Law wasser
doran, oder so du dz Law wasser nit
Hattest, ein ander frisch bronwasser,
vnd seüde solches fast ein gantzen tag
(//f. 16r)
doran, oder so lang biß sich die
Lederlin gantz Kläberig Zwischen
den fingern Zer-
reiben, vnd Zertrucken lassen, Dan
wider ain frisch eindweders von
Law, oder anderm frischen bron
wasser dorüber gegossen, vnd aber
malen gesotten, vnd dz so lang
getriben, biß sich die Lederlin
gantz und gar in dz wasser gesotten
haben, vnd ein fein Lindes Leim
wasser worden ist. Die an-
dern Fetzen aber so von den Läder-
schnipfflin kommen, vnd nit kläberig
ist, die schütt Hinweg, vnd dz gesott(en)
(//f.16v)
Leim wasser dz behalt alle Zusammen
in ainer gelten oder Züberlin, so ist
alß dann dz Leimwasser wol bereitet
vnd fertig.