Recipe .4. pont lyn olij of noet olij hoe ouder hoe beeter, .4. loet mastick, .4. loet
coperroet, .j. wirdel lots wirock al ghepuluerizirt, ende .ij. loet spigelhars, menie,
oker, van elx .iiij. loet ghepuluezirt. Ende dit machmen al thoe samen. Ende men sal
den olij irst opt fuer setten dat hy sydende wort. Soe salmen dan dese voerscreuen
substancie dar in doen ende rorent altoes myt eyn stock daer twe ow loken aen
gesteken ende dit roren ende dit siden sal duren .ij. vren. Ende alstmen pruuen wyl
myt zuarte of ander alre hande verue, so salmen nemen .ij. deel lynsaet oly. ende dat
dardendeel wtter (fol. 24v) voerscreuen substancie wt den pot met der maten of
sunder maten. Ende ys dat cleet olt ofte dunne soe doet dar meer the wtten pot of
het soude vloyen. Mer is dat cleet nye ende dicke se en yst gheen noet, soe moegdi
dy printe dar mede wullen, soe dat w dunct dathet zuart ghenoch is. Ende
ist sake dat het nyt genoch en heuet van gebranden swarte, so machmen nemen
wynrancke ende bernen dy yn een poot alte kalen ende wriuen sy myt water ende
doen sy op eyn kryt steyn ende latent droghen ende doent totten gebrande zwarte
alsoe wele dat het wel wanden printe gaet. Ende alle ander werue het sy groen of
roet, gheel of blaeu. Ende dy machmen yrst weruen wriuen mytten water ende latense
droghen. Ende temperense myt olije ende myt substancie wter poot voerscreuen.
Ende wynter daghes alst nyt weel droghen een wyll, soe vriuet daer wat coperroet
yn, het sal tbeet drogen. Item [men] sal dat laken licken myt een lick steen, dat suldi
doen allen laken dy ghy weruen wilt.