So neemt .ij. loet brisilien houts ende is brisilien seer goet so neemt bi .iii. verendel
loets ende raspet met een rasp of puluerzeert in een visel of in een molen zeer clein.
Ende dan hanget dat puluer ouert vier in een ketel met scoen water. Ende het is te
weten datmen tot elke siedinge een querte waters of .v. pinte sal doen na dat die
brisilien (fol. 30v) goet is ende latent sieden ouer tfier wel passelic alte samen ende niet te
seer. Ende decken dese voirseide ketel met een rein dexel dat dair niet in en valt.
Ende alst ghesoden is op die helft, so neemt een schoen houtkijn ende steect dat in
die verwe ende doet op v naghel ende dan suldi wel sien oft ghenouch ghesoden
is ende oft ghenouch werwe heeft, mer dan so is die verwe op sijn bleechste ende
dunste. Ende alst bi na alte haluen versoden is, so suldi nemen tot elke .ij. loet brisilien
hout een pinte loghe ghemaect van scoen calc ende doense in den ketel die dair siedet
ende latent een luttelken dair mede sieden tent een weinich dicker wort ende roder.
Dan suldi bereit hebben een schoen aerden pot test binnen wel verlodet, ende dair
suldi die verwe in cleinsen doer een sconen douck. Ende dair na suldi also veel aluyns
nemen alst die helft van jou brisilien voirseid. Ende dan neemt schoen water ende
neemt dat inden voirscreuen douck ghebleuen is dair ghi die voirseide verwen doer
ghecleinset hebt. Ende [doe] dat water met den voirseiden puluer ende met den aluyn
ouer tfier ende prouuent in jou mont oft sterck ghenouch ghealuynt sy na wise ende
manieren alsmen spise plach te souten. Ende alst een wile dair mede heeft ghesoden,
so suldi jou leder dair mede ouer stricken ende latent een luttel wint droghe worden
maer niet alte seer. Ende dan so moghe dij jou leder verwen metter eerster voirseide
verwe. Ende niet alte veel tot elken mael dattet leder niet doer en slaet te seer ende
sachtelic sonder te heet maken; tegen dat vier ist best. Ende en laet niet te seer droghen
ende bestrijckent also menich weruen tot dat ghenouch heeft ende latent wel droghen.
Ende legghent dan op een schoen tafel of banck ende lickent ende brunerent dat mit
een licksteen dan salt hem wel openbaren oft bruun ghenouch si of niet.