Recipe .j. vierdel copers ende .ij. loet arsenicum album, ende .ij. loet arsenicum
rubeum. Dyt suldi tsamen pulueresiren ende doet yn een krusken ende stoppet wel,
dat dat kruse den mont waste thoe sy myt wyt vanden eye ende wyt kleye ende pot
eerde ende gumme van arabien, ende werc dyt tsamen gedaen ende vast thoe
gestopt. Ende dyt een gode wyle in perts mysse gheset. Ende dat het ymmer roet
koper sy. Lyt siluer machmen ghyten, mer nyt driuen mytten hamer, probatum est.