Winckel-Liedt, voor de Schilder-Jeught, nae de wijse: Een aerdigh Venus Dier,, Heeft my in haer bestier, etc.
Comt Lust, des Gheests vriendin,
Met my in hert en sin
Omhelsen nu de Ieught, vry van getruyre,
maeckt dat ick haer bekin,
Om Const te teelen in
Begeerlijckheyt, ontsteeckt ghy t'minnen vuyre.
Liefd' opent de Natuyre,
Dat sy ontfangt mijn saedt,
Om baren t'haerder baet
Twee vruchten t'eender uyre.
Dees vruchten ons bequaem,
Seer eerlijck en lofsaem,
Als d'eerst een soon, moet Arbeydt zijn geheeten,
De tweede haren naem,
Een dochter sonder blaem,
Zy Neersticheyt, genegen tot veel weten,
Een Boeck vol van secreten
Werdt haer ten dienst ondeckt,
Van onsen vriendt verweckt,
Door Liefd', en ons toemeten.
Mijn lust nae s'gheests ghebien
De Ionckheyt te bestrien,
En t'hert met yver groot tot Const te leyen.
Ick gheeft wils' oock tot dien
Met goet begrijp versien:
Nu laets' ons bey gelijck den wegh bereyen,
Ras Ieught wilt u vermeyen,
Pictura wel ghesindt
Tot die haer recht bemindt,
Comt self u noon en vleyen.
O Gheest, mijn Heeren Man,
Dien ick oyt vruchten wan,
Als ick my nu te wil ghetrou gingh voeghen,
Die't soude hindren dan
Dat die zijn in de ban,
Als traecheyts onlust, die niet geerne ploeghen,
Een leersaem onvernoeghen
Doch in mijn hert ontsteeckt,
Op dat my niet ontbreeckt,
Noch quelt versuymens wroeghen.
Weest Ionckheyt wel te vreen,
Wy sullen u besteen,
Den grondt der Schilder-const met vlijt te leeren.
Ick Lust sal u voor treen
In't School, nu elck ghemeen,
Goet onderricht sal u t'verstant vermeeren,
Staegh oefning, meer begeeren,
Met Pacientich spoen,
V sullen voordeel doen,
Soo ghy haer houdt in eeren.
Dus Ieught, die zijt bereyt
Met lust tot neersticheyt,
Ick wil u leyts-vrou zijn door s'gheests ingheven.
Wordt van u niet ontseyt
Haer Broeder den Arbeydt,
Dijn welvaert schenck ick dy voor al u leven:
Sijt ghy van liefd' ghedreven,
Den tijdt sulcx openbaert,
Ghy werdt in Const vermaert,
Als Goden hoogh verheven.
Deught verwint. P.C. Ketel.