Winckel-Liedt voor de Schilder-Jeught, op de wijse: De lustelijcke Mey, etc.
1.
Verlangend' Hert.
Nv leer-gierighe Ieught,, met my verheught,, en vrolijck werdt,
Ons wensch, ons lust, en hope,, is te coope.
Leer-gierighe Ieught.
Dit weten brengt my vreucht,, en doet my deught,, verlangend' Hert,
Dies ick door liefdes nope,, daer nae loope:
Want my de gheest,, tot Const verweckt
Met lust, die elck meest,, tot leer-sucht yvrigh treckt,
Door Manders onderrichten, t'welck ons duystere ghesichten
Comt verlichten.
2.
Leer-gierighe Ieught.
Recht als een swangher Vrouw,, in't hert lijdt rouw,, en is ontrust,
Soo sy haer lusts verwerven,, langh moet derven,
Ick mijn begeert aenschouw,, tot leeren nou,, geheel belust,
Om Const door arbeydts swerven,, te beerven.
Neersticheyt wordt,, van my ghebaert,
Die my Geest instort,, met lust en liefd' ghepaert,
Goet onderwijs by desen,, sal mijn Meesters ghepresen
Mildt nu wesen.
3.
T'verlangend' Hert.
Ghelijck t'vermoeyde Hert,, uyt dorstigh smert,, nae t'water haeckt,
Een Visch die leyt op't drooghe,, langt nae t'hooghe,
Vind' ick my aenghecert,, in sin verwert,, die vierigh blaeckt
Tot dit (daer ick om pooghe),, nut vertooghe:
Een lusthof schoon,, ons seer bequaem,
Die elck hier te noon,, zijn wy meest aenghenaem:
Dus laet ons bloemkens plucken, en wijn uyt druyven drucken,
T'sal ghelucken.
4.
T'verlangend' Hert.
Comt Voort-porrende sin'rasch leydt ons in,, de Boomgaert rijck,
Om plucken van zijn vruchten,, met ghenuchten.
Des Hoveniers ghewin,, is dat elck min,, vry nae hem strijck,
Wy hebben niet te duchten,, quaey gheruchten,
Haghel noch windt,, oft couden swaer,
Geen rijp die verslindt,, het bloeysel wit te gaer,
Geen stekel-wormen schadigh,, is Pallas by ons stadigh
Wijs beradigh.