die gheen goet Teyckenaer en was, welcke meyninghe recht is,
dewijle het
* teyckenen den grondt, en ingangh is tot dese, en
meer Consten: oock most een Goutsmidt doe ervaren zijn in't rondt, oft van
rondt te wercken, oft bootseren. Dus teyckenende en bootserende van wasch en
potaerde, en comende op eenen winter-dagh op de plaets van S. Pollinari,
daer seer veel sneeuws over hoop lagh, werdt hem van yemandt gheseyt, waer dit
Marmor, en datmer mocht afmaken eenen grooten Reus, liggende als den Roomschen
Marforio: stracx de Cappe neder gheleyt, sloegh handt aen de sneeu, en
van ander Iongers
* geholpen toebrengen, en afnemen sneeu, daer het behoefde, maeckte
een liggende Marfory-beeldt, van acht ellen lang, dat hem een yegelijck
verwonderde, dat hy soo gheestich dit bestaen, en kindt wesende hadde ghedaen.
Genoech bewees hy, meer tot Beeltsnijden, als Goutsmeden te wesen geneycht.
* Buyten Florencen hadde zijn
Vader een Hoeve, daer hy den arbeyders hem naeckt voor liet staen, de selve
conterfeytende met alder vlijt: soo dede hy oock verscheyden dieren aldaer
wesende. Niet wijdt van daer was ghelegen Prato: hier trock hy smorgens
vroegh henen, en bleeffer den heelen dagh, teyckenende in de Capelle nae de
schilderije van Broer Philippo Lippi, tot hy't al naegedaen hadde,
volgende de manier der ployen van t'laken van desen Meester, die te desen deele
uytnemende was: En Baccio handelde seer aerdich met Pen, en met root en
swart crijt. Eyndeling wert hy bestelt van zijnen Vader by Ioan Francisco
Rustici, Beeldtsnijder, van de beste van der Stadt, alwaer Lionardo da
Vinci dagelijcx oock was: welcken siende zijn teyckeninge en begin, hadder
behagen in, en trooste den Iongen, hem radende sich te houden op het rondt, hem
grootlijcx prijsende de wercken van den Beeldtsnijder
Donatus. Riedt hem wat te maken van Marmor, t'welck hy dede: en
conterfeytte een Vrouwen hooft, dat van den Antijcken was afgegoten: dit
voor zijn eerste werck maecte hy redelijck wel. Doe Baccio hier nae
eenige Modellen van aerde hadde ghemaeckt,
* heeft den Vader dese zijns
Soons heerlijcke studie willen te baet comen, ontboodt van Carrara
eenighe stucken Marmors, en liet hem t'eynden zijn huys een bequaem werckplaets
maken. Hier volmaeckte onder ander gebootseerde stucken Baccio
eenen Hercules met Cacus onder voet, van twee ellen en
half langh. Op desen selven tijdt was ghedaen en ontdeckt den Carton van
Michel Agnolo Buonarotti, daer elder noch meer af gheseyt wort, wesende
vol naeckten, om welcken te conterfeytten grooten toeloop was van de Ieucht,
die tot Teyckenconst sich begaven: onder ander Baccio, die corts alle
d'ander Teyckenaers te boven gingh, soo in omtreck, musculen, verdiepingen, en
wel te voldoen: Onder dees Ionghers waren, Iacob Sansovino, Andreas del
Sarto, Rosso noch jongh, en meer ander. T'is gheschiedt in veranderinge en
oproer der Stadt, dat Baccio hebbende eenen gheconterfeytten sleutel, is
ghecomen heymelijck in de Sael daer den Carton was, en scheurde hem in veel
stucken:
*welck van hem gedaen, een al te schandighe
daedt was, te verderven soo uytnemende werck, dat een licht was der rechter
Teycken-const. Hier van wist men niet d'oorsaeck, die Baccij snooden
gheeft dit te doen hadde verweckt: Eenige meenden, t'was dat hy d'ander
Leerjeught van sulcken groot voorbeelt wilde berooven, op datse hem niet te
boven gingen: Ander, dat hy eenighe besonder deelen voor hem selven ghenomen
hadde, oft dat hy't hadde gedaen ter gunst van Lionardo da Vinci, wien
desen Carton veel van zijn eere in de Const