die't saghen,
bysonder Lionardo da Vinci, seyden, datmen noyt te sulcken deele beter,
noch met meerder Const en heeft ghesien te wege gebracht, oft ghedaen. Hier nae
maeckte Baccio eenen Marmoren S. Pieter, vier ellen hoogh, die
niet al te wel nae der Beeldtsnijders maniere gedaen, maer goet van teyckeninge
was. Hier nae maeckte hy eenen Hercules, van negen ellen en half hooghe,
tot de blijde incomst van Paus Leo de thiende. Desen was van
aerde so ick meen, van desen roemde Baccio te vooren, dat hy beter soude
wesen als den David van Buonarotto: maer het segghen met het
doen, noch t'werck met den roem niet over een comende, werdt Baccij eere
onder den Const-verstandighen wat vermindert. Wetende hier nae Baccio,
dat van des Paus wegen was besteedt aen Andreas Contucci een seker
werck, tot onse Vrouw van Loreten, met Beelden en Historien van Marmor, alwaer
Andreas alree eenighe dingen loflijck en wel ghedaen hadde, en aen
d'ander doende was, maeckte Baccio een schoon Model van eenen naeckten
David, die onder hem heeft Goliath, en hem het hooft af slaet,
met voorneem, hem te gieten van Coper, oft te houwen van Marmor, om te stellen
in't Hof des Paleys van Medicis, daer te vooren eenen
David had ghestaen van Donatus. Dit Model bracht Baccio te
Room by den Paus, den welcken niet en docht tijdt te wesen den David
daer toe te maken: maer seynde Baccio nae Loreten by Andreas
Contucci voornoemt, datmen hem daer soude gheven te maken eenighe
van den Historien. Hier was hy van Andreas wel ontfangen en onthaelt,
soo om zijn gherucht, als om dat hy van den Paus daer ghesonden was. Hem werdt
gegheven een Marmor, om daer uyt te maken de gheboorte van Maria. Baccio
t'Model gemaeckt hebbende, begon in't Marmor te wercken: maer wesende
een Mensch, die geen geselschap noch weergade mocht verdragen noch lijden, en
die weynigh lof con seggen van anderen, begon hy tegen d'ander Beeldtsnijders,
die daer waren, te lasteren het
* werck van Andreas, seggende, dat zijn werck
geen teyckeninge en hadde, ghelijck hy oock van anderen seyde. Dees dingen
Andreas ter oore gecomen wesende, hy als wijs, en redelijk, berisptede
Baccio hier van met aller vriendelijckheyt en beleeftheyt, seggende
onder ander, De wercken worden ghedaen metter handt, en niet metter tonge, en
dat de goede teyckeninghe niet en is te sien in papier, maer als t'werck
voldaen is in den steen: eyndelijck, dat hy toecomender tijt van hem behoorde
met meerder aensien te spreken. Maer Baccio hooghmoedigh met
lasterlijcke woorden antwoordende, condet hebben, en hadmer niet tusschen
gheweest. Des Baccio most vertrecken, en liet zijn Historie brenghen
t'Ancona, alwaer hyse bycans voldaen liet blijven, en vertrock. Dese
werdt van Raphael van Monte lupo voldaen, en werdt neffen die van
Andreas ghestelt, doch niet soo goet werck als dat van Andreas,
hoewel geen lof onweerdigh. Baccio keerde teRoom, en vercreegh door
Cardinael Iulio de Medici aen den Paus, dat hem was gegheven te maken
eenigh Beeldt, voor t'Pallaysich Hof van Medici, in Florencen. Dus
gecomen te Florencen, maeckte eenen Orpheus van Marmor, die spelende den
Cerberus versacht, en de Helle tot medelijden beweeght. In dit werck
volghde hy den Apollo van Belvidere te Room, hoewel zijnen
Orpheus de selve actie niet en doet, soo heeft hy seer eyghentlijck de
maniere van t'lichaem, en alle de leden naegevolght. Hier nae liet den
voornoemden Cardinael Iulius hem maken, om zijnen hof te
Room onder den bergh