soo blijven. Doe dit werck ontrent ten halven, de Beelden
som op gedaen, en sommighe ghebootseert waren, bracht den Hertogh weder wat
nieuws in't hooft, te weten, den Choor, t'ghestoelt, en t'hoogh Altaer van S.
Maria del Fiore. In dit werck was Baccio weder aen t'Marmor
Beelden maken: onder ander eenen Adam en Eva, van welcke
hy van elcx eenighe maeckte, die hy in ander Beelden veranderde. Eyndelinge
maeckte hy eenen Adam en Eva met grooter vlijt en begeerte,
meynende hier mede t'gemeen volck, en die van der Const, gantsch wel te
vernoeghen, hebbende hier in sich selven volcomelijck vernoeght. Dese ghedaen,
en wel net ghepolijst op hun plaets ghestelt, hadden t'selve geluck van zijn
ander dingen, en werden te jammerlijck met Latijnsche en Tuscaensche
schimpdichten bevochten, waer van een op desen sin seyde:
Het Lusthof was onteert van Adam en sijn bruydt,
Door onghehoorsaemheyt, des mosten sy daer uyt:
En dees twee Beelden oock der aerde schande gheven,
Verdienen uyt de Kerck daerom te zijn ghedreven.
Hier is te mercken, hoe de trotsighe dickwils ghetrotst worden, en
dat selden yemandt alle eygenschappen der Consten heeft. In Baccij
dinghen faelde altijt meest de gracelijckheyt: want dese Beelden hadden goede
proportie, en waren in vele deelen schoon en wel verstaen, en hebben
teyckeninge ghenoech om loflijck gherucht te verdienen. Doch ist gheschiet, dat
een Edel Vrouwe, dees twee Beelden vast besiende, van Edellieden werdt
gevraeght, wat haer docht van dese naeckte lichamen. Sy antwoorde: Van der
Mannen lichamen voeght my geen oordeel te gheven. Sy voort wesende ghebeden,
haer ghevoelen
* te seggen van de Vrouw, seyde sy:
Dees Eva heeft twee goede deelen, die weerdich ghepresen zijn: want sy
is wit, en stantvastich. Een aerdige listighe antwoorde, die al prijsende,
lasterde den Constenaer en zijn werck: verheffende alleen de gedaente
van het Marmor, en twee prijselijcke deelen, den Vrouwen betamende oft wel
voegende, daer onder begrijpende. Baccio maeckte tot den Altaer noch
twee Beelden van Marmor, eenen naeckten Christus, met eenen Enghel die
hem ophoudt, dat wel van zijn beste werck was: en eenen Vader half naeckt, als
eenen Iuppiter, die onvoldaen was. Baccio ten lesten hadde
* niet meer acht op den clap des volcx, dan alleen hem selven
rijck te maken, coopende veel schoon Hoeven van Wijngaerden, en groote
heerlijcke huysen, niet willende hem selven voort veel quellen met den
arbeyt, hoewel t'Graf van den Heer Ioan, de Camer der Audientie van de
sael, en den Choor met den Altaer van Sancta Maria del Fiore,
onvolmaeckt bleven. T'is gheschiet, dat uyt Vranckrijck is ghecomen
Benvenuto Cellini, die Coningh Francisco had ghedient voor
Goutsmidt, in welck hy uytnemende was, en had oock voor den Coningh yet
ghegoten. En also den Hertogh lustigh was, de stadt Florencen te vercieren,
werdt hem toeghebracht en ghepresen desen Benvenuto: welcken den
Hertogh, nae veel gonst en beleeftheyt, gaf te maken een coper Beeldt van
ontrent vijf ellen hoogh, eenen naeckten Perseus, hebbende onder hem een
naeckte Medusa, die hy onthooft heeft: dit was om te stellen onder een
van de boghen van de Logie op de plaets. Benvenuto hier aen, en aen
ander dingen
*
doende wesende, heeft nijdicheyt Baccij herte seer gequelt en beroert,
dat dus een Goudtsmidt stracx Beeldtsnijder was: en die cleen Beelden,
Medaillen, en ander minute dingen was ghewent te maken, nu bestondt groote
Colossen