een Mary-beeldt t'conterfeytsel van zijn Nichte, en ooc dat van
haren Man. Francesco, boven zijn voorighe gheluck, was seer verblijdt,
om dat Vasari zijn medegheselle daer oock gecomen was, welcken woonde by
Cardinael de Medicis, end' en waren niet wijdt van malcander: des sy
niet aenmerckelijcks in Room nae en lieten, oft sy en hebbent t'samen
gheconterfeyt: en al den winter t'samen, wanneer den Paus uyt was, teyckenden
in de Camers heel daghen sonder eten, en met groote coude. Francesco
worde van zijnen Cardinael gheordineert, te schilderen in de Capelle van zijn
Paleys eenighe Historien van S. Ioan Baptiste, waerom hy hem met
Vasari in een stove begaf te studeren naeckten nae t'leven, en in
Campo santo deden sy eenighe Anatomien. Vasari vertrock nae
Florencen. En Francesco, nae eenighe groote sieckte, maeckte sommighe
wercken in S. Maria della Pace, die seer gepresen waren: daer nae by
Pont S. Agnelo, voor een Paleys des Paus wapen, met groote Beelden en
naeckten op't nat, die seer bevallijck waren. Hy maeckte hier nae een goet
conterfeytsel, en in S. Francesco tot A Ripa, een schoon Mariae
boodtschap, in Oly, gedaen met grooter vlijt. Voorts Ao. 1535. in
s'Keysers comst te Room dede Franciscus (die nae den Cardinael zijn leven
Salviati den toenaem behiel) dinghen van wit en swart, die boven alle
ander ghepresen waren. Hier nae maeckte hy op doecken van waterverwe t'leven
van den grooten Alexander, die daer nae in Vlaender waren, in Tapijt
ghewrocht. Hier nae schilderde hy noch eenighe dingen van Triumphen, en tot een
Comedie een fraey prospective: noch in eenen Boeck voor een Poeet veel
historikens, en voor zijnen Cardinael een teyckeninghe van roo crijt, daer
David ghesalft wort: en was wel t'beste van al t'geen Franciscus Salviati oyt teeckende: dit worde met ingeleyt goudt ghewrocht van
Damiaen van Bergamo. Francesco werde hier nae doen
schilderen een Historie in de Kerck, van S. Ians onthoofdinge, op't
Capitolium, daer Maria Elisabeth visiteert: dese was voldaen
Ao. 1538. op't nat, en is wel van de beste Schilderije die
Francesco oyt dede, so in't ordineren, en t'samen voegen der Historie,
en het verminderen der figueren, met regel der prospective, met Architecture in
ghebouwen, oock naeckte en ghecleedde, de gracelijckheyt der tronien, en in
alle deelen, dat geen wonder is datter al Room in verwonderde. Ontrent een
venster maeckte hy eenige aerdicheyt en historikens als van marber, die wonder
aerdich zijn. Geentijts verloor Francesco tijdt, maer terwijlen hy dit
werck in Campidoglio dede, teeckende hy eenighe dinghen, en schilderde
eenen Phaeton, die Michel Angelo gheteyckent hadde. Naer meer
wercken quam Francesco tot Florencen, daer hy van zijn maeghschap wel
ontfangen was: daer begon hy een Historie, voor een triumph van de Bruyloft van
den Hertogh Cosimus, de welcke hy een ander nae zijn teyckeninghe liet
voleynden, en reysde nae Venetien, daer hy van den Patriarch beleefdelijck
ontfanghen worde, en maeckte voor hem d'Historie van Psiche, t'welck wel
is de schoonste schilderije die binnen Venetien is. Daer naer in een
Camer, daer Ioan van Vdine veel dingen van stucco hadde ghedaen,
maeckte hy eenige Beelden, naeckt en ghecleedt, die seer gracelijck zijn. Tot
de Nonnen van Corpus Domini, ooc te Venetien, maeckte hy met grooter
vlijt eenen dooden Christus, met de Marien, en eenen Engel in de
locht, met de reetschappen der passie in handen. Hy conterfeytte den Poeet
Pieter Aretino, welcken dit met eenige versen, tot deses Schilders lof,
als een bysonder dingen, sondt aen