1548. en cocht een huys by t'Paleys
Farnese, doe worde hem van den selven Cardinael besteedt de Capelle van
t'Paleys van S. Giorgio, daer hy fraey comparteringe van stucco
maeckte, en een aerdigh verwelf van beelden en Historien van S. Laurens
in't nat, en op eenen grooten steen van olyverwe den Kerstnacht,
daer in oock des Cardinaels conterfeytsel: dit was al t'samen seer constich en
wel ghedaen. Naer ander meer wercken maeckte hy in S. Salvator del
Lauro, by Monte Giordaen, de Bruyloft van Cana Galileen, en boven de
poorte van olyverwe daer S. Iooris den Draeck doodet, seer aerdich
ghecoloreert. Op desen tijdt sondt hy te Florencen een groot stuck van
olyverwe, een Adam en Eva, een seer schoon werck. Hy maeckte in't
Paleys Farnese in een Sale twee groote vacken muers, van seer fraey
inventien, Historien van die van t'Huys Farnese, waer in comen eenighe
Conterfeytselen, oock een Fama, met ander Beelden, die seer schoon zijn,
doch voldede alles niet: dan (also noch volghen sal) worde door Taddeo
Zucchero voleyndt. Franesco voldede tot Popolo de Capelle,
welcke Sebastiaen del Piombo hadde begonnen voor Augustijn Gigi.
Doe schilderde hy noch voor Cardinael Riccio van Monte pulciano,
een seer schoon Sale, in strada Guilia, de Historie van David, en
onder ander een Bersabe haer badende, met ander veel Vrouwen, seer wel
wesende gheordineert: in een ander, daer Vrias verslagen wort. Oock
isser een Historie, daer d'Arcke met veel gheluyt voort is ghedragen: Elder is
noch een seer aerdighe Bataille. En om cort te maken, dit werck is ghestort vol
gratie, bootsige versieringe, en aerdighe inventie: de comparteringe is oock
ghedaen met veel opmerckinghe, en vrolijck van verwe: en om de waerheyt te
segghen, Francesco hem bevoelende machtigh, en overvloedigh van
inventien, en hebbende de handen in de gehoorsaemheyt van zijnen grooten geest,
hadde altijts wel willen hebben uytnemende en onghemeen groote wercken op zijn
handen: en soo hy gevonden hadde eenich Prince, die hem hadde laten
wercken nae zijnen sin, hy soude ongetwijffelt uytnemende dinghen hebben
te weghe gebracht: want hy oock universael was, en wel ervaren in alle de
deelen der Schilder-const: zijn tronien gaf hy allesins een groote schoon
welstandicheyt, en was soo goeden Meester van naeckten, als t'zijnen tijde
Schilder leven mocht: in zijn laken hadde hy oock een seer edel gracelijcke
maniere, zijn beelden so aerdigh en op so fraey nieuw maniere altijts
omhangende, en becleedende daer't aen den naeckten alderbest voeghde, en soo
fraey van hulselen, schoeyselen, en ander cluchtighe cieringhe, handelende oock
soo wel alderley manieren van verwe op nat, in Oly, lijm, en Eyverwe, datmen
hem versekeren magh, dat hy is heweest een van de veerdichste, cloeckste, en
vlijtichste Constenaers van onser eeuwe: maer weynich groote wercken dede hy,
oft ten lesten en krackeelde hy om den loon, t'welck hem schadigh was: want hy
van velen daerom gheschouwt worde. In't Iaer 1554. trock Francesco
(ghesonden wesende uyt begeerte des Conings) nae Vranckrijck: Hadde oock
versekeringe van den Coningh te Room, dat aen betalinghe niet schorten soude.
Francesco hadde huys en reetschap vercocht, meenende in Vranckrijck zijn
leven langh te blijven: doch behiel zijn Officien. Hy worde te Parijs
vriendlijck ontfangen van den Abt van S. Martens, Francesco van
Bolognen, Schilder en Bouwmeester des Conings, en veel beleeftheyt bewesen:
maer Salviati liet wel haest blijcken, wat hy voor een was: want hem en
worde niet ghetoont van Rosso, oft