cort dede, en hadde hem
de jonckheyt niet te bate gecomen, haddet moeten besterven: doch sieck
wordende, en van Francesco voornoemt niet meer als eerst geholpen, trock
nae huys by zijnen Vader. Ghenesen wesende, en den lust niet vermindert, keerde
weder te Room, hem schickende by eenen Iacopone, daer leerde hy soo
veel, dat hy in achtinghe begon te comen: des zijnen maegh oft vriendt, die soo
wreet tegen hem plach te wesen, hem siende soo geschickt in de Const, nam hem
by hem, om zijn behulp te ghenieten, en begonnen t'samen te wercken,
wesende Taddeo, die goet aerts was, alle ongelijck vergeten.
Taddeo makende de teyckeningen, maeckten sy t'samen veel Camer frijsen
en Logien op't nat, helpende also malcanderen. Hierentusschen
Daniel van Parma, die veel Iaren hadde gewoont met Antonio da
Coreggio, en omgegaen met Francesco Mozzuoli Parmesaen, hebbende
aengenomen te schilderen een Kerck op't nat, voor aen in Abruzzo
tot Vitto, aen gheen sijde van Sore, nam hy Taddeo met hem
daer buyten. En al was Daniel den besten Schilder niet, dewijl hy die
voornoemde groote Meesters veel hadde sien wercken, so waren Taddeo zijn
woorden meer vorderlijck in't onderwijsen en seggen, dan of hy een ander
hadde sien wercken, verstaende uyt hem, met wat poeselicheyt en
soeticheyt sy hun wercken deden. In dees Kerck dede Taddeo verscheyden
Beelden: het welfsel cruyswijs bedeelt, maeckte Evangelisten, Sibillen, en
Propheten, met noch vier Historien van Christus en Maria. Doe hy
te Room weder gecomen was, soude hy voor een Edelman Iacob Matthei
schilderen een Facciate: maer want hy noch maer 18. Iaer oudt was, docht
hy den Edelman te jongh, liet hem twee Historien maken, segghende, bevielen sy
niet, men soudese afsmijten: de welcke gedaen wesende, den Heer niet alleen wel
aen en stonden, maer deden hem des welstants halven grootlijcx verwonderen. Doe
nu Anno 1548. dit werck gedaen was, wesende de geschiedenissen van
Furius Camillus, was het grootlijck van gantsch Room met goede reden
ghepresen: want van Polidoor, en Baldassari van Siena, tot
doe ter tijdt, was gheen Schilder tot dat teycken gecomen. Hier nae dede hy in
de Kerck van S. Ambrosio der Milanesen, eenige Historien van desen Sanct
op't nat, en een Frijse met kinderkens, en termen van Vroukens, dat een
redelijck schoon werck was: Oock tot S. Lucia della tinta by
Orfo, maeckte hy een Facciate van wit en swart, met vijf Historien van
Alexander magnus, die seer gepresen worde, al stondter een Facciate
neffens tot een Paragon van Polidoor. Doe nu den Hertogh van Vrbijn,
Guido Baldo, hoorde de faem van desen Ionghen zijnen ondersaet, ontboodt
hem t'Vrbijn, om te maken de Capelle van den Dom, daer Batista
Franco t'welfsel van hadde ghedaen op't nat. Daer ghecomen wesende, worden
hem van den Hertogh veel beleeftheden betoont, en gaf hem orden, wat hy voor de
Capelle en andersins te teyckenen hadde. Maer den Hertogh, wesende Generael oft
overste Veldtheer der Venetianen, most reysen nae Verona, om de
sterckten te besien, nam met hem Taddeo, die hem een Tafel van
Raphael conterfeytte, ten huyse van de Graven van Canossa. Noch
op eenen grooten doeck maeckte hy voor zijn Excellentie een Pauli
bekeeringhe, die niet voldaen worde. Tot Vrbijn weder gecomen wesende,
was vast doende met te teyckenen Historien van t'leven Mariae om de
Capelle, met de penne en ghewasschen. Dan of den Hertogh niet gheresolveert
en was, of Taddeo hem te jongh docht te wesen, daer liepen twee Iaren
henen, dat Taddeo niet anders en dede, dan te Pesaro