een studoorken, en t'Vrbijn voor t'Paleys op de Facciate een groot wapen
op t'nat, en t'conterfeytsel van den Hertogh, groot als t'leven, dat al schoon
en wel gedaen wercken waren. Eyndelijck doe den Hertogh te Room most reysen,
liet hy Taddeo te vervolgen t'werck van de Capelle, en datmen hem van
alles wat hem behoefde soude voorsien: maer des Hertoghen volck hem geen behulp
doende, veroorsaeckten dat Taddeo oock nae Room trock, alwaer hy den
Hertogh vondt, en verexcuseerde hem seer behendich, sonder yemandt te
beschuldighen oft lasteren, belovende alst tijdt waer zijnen dienst niet te
laten ontbreken. Doe worde hem voor den Paus doen schilderen buyten Porte
popolo, de Camers van den Hof: in een midden viercant van een welfsel
maeckte hy een Occasie, die de Fortuyn by t'hayr houdt, en wilse met een schaer
t'hayr afsnijden, en meer ander dingen, die hem voordeel deden, wantse den Paus
behaeghden, en hem daerom liet schilderen eenige Camers, boven het Corridoor in
Belvideer, te weten, eenige gecoloreerde figuerkens in frijsen, en noch een
Logie, daer van wit en swart Historien van Hercules waren: maer
Paulus de vierde Paus liet dit af breken om ander ghebouw te maken. Noch
in den Hof van Papa Iulio, heeft hy verscheyden fraey dinghen ghedaen.
Hy dede noch met Federigo zijn broeder verscheyden wercken te Room, in
een Paleys op de plaetse van S. Apostolo, en in ander huysen. Hier naer
dede hem maken een Heer Iacob Matthei, een Capelle in de Kerck
van Consolatione onder Campidoglio, t'welck Taddeo
geern dede, om den mondt te stoppen eenighe, die te Room seyden, dat hy niet
conde als Facciaten oft ghevelen schilderen van wit en swart, en wilde daer
toonen, dat hy oock van verwe conde schilderen. Doe hy dan nu aen dit werck de
handt hadde, en wrochter niet aen, dan als hy grooten lust om wat goets te doen
in hem bevoelde, anderen tijdt latende in dingen, die hem soo niet en
prickelden, gelijck dit, ter saken van eere, dat hy dit werck met goede
gelegentheyt voldede in vier Iaren. In't welfsel maecte hy op't nat vier
Historien van de Passie, niet seer groot, met seer aerdighe inventie,
teyckeninge, en coloreringe: d'een is t'Avontmael, t'ander de voetwasschinghe,
t'derde t'Hofken, t'vierde de vanginghe. In een van de vacken ter sijden is de
geesselinge, figueren als t'leven: in't ander den Ecce homo. Boven dese
Historien, in twee boghen zijn noch twee Historien: d'een, daer Pilatus
de handen wascht: in't ander, daer Christus voor Annas is. Op
t'vack van den Altaer is t'Crucifix, met Magdalena aen Christi
voeten, en de Maria in onmacht ghevallen liggende. Noch zijnder in de
twee sijden twee Propheten, en in den boge boven het ornament van stucco twee
Sibillen: welcke vier figueren handelen van t'lijden Christi. Noch zijn
in't welfsel vier Evangelisten halve Beelden. Dit werck worde ontdeckt
Ao. 1556. doe Taddeo niet meer als 26. Iaer oudt en was: en
dit worde en is gherekent een seer excellent werck, en hy van ghelijcken onder
den Constenaers een uytmuntende Schilder. Hier nae schilderde hy in S.
Marcello noch een Capelle, daer hy oock te werck stelde van die Iongers,
die men altijt te Room vindt, die te leeren soecken: doch en voleyndese dat
eerste mael niet. Noch schilderde hy eenige dingen in s'Paus Paleys, eenige
Camers op't nat, en eenige Tafels van olyverwe, die in Portegael ghesonden
waren. Noch schilderde hy voor den Cardinael van Mantua by d'Arcke van
Portegael een Paleys, dat metter haest most zijn ghedaen, en veel volcx in't
werck hadde, daer hy wel bewees zijn Const en verstandt, elck