te
stellen in't gene, daer hy goet toe was, dat het al schijnt van een handt
ghedaen te wesen: des hy den Cardinael seer wel vernoeghde, tot zijnen grooten
voordeele. Hier nae maeckte Taddeo noch eenighe wercken in sommige
huysen. Hier nae was Taddeo aenghenomen van den Hertogh van
Guise, te trecken in Vranckrijck, om zijn Paleys te schilderen, met een
pensioen van ses hondert Croonen s'Iaers, en hy soude den Hertogh volghen, als
zijn werck te Room waer voldaen: want t'gelt was daer toe op de banck ghelaten,
hem op de reyse te schicken, gelijck Taddeo soude hebben ghedaen, hadden
de krijghen in Vranckrijck niet opghestaen, en corts daer nae den Hertogh niet
aflijvich gheworden. Doe begaf hem Taddeo zijn werck tot S.
Marcello te eyndigen: maer werdt belet, met te moeten maken verscheyden
Historien van Carolus Quintus, tot zijn heerlijck Wtvaert binnen Room
ghehouden, en meer ander dingen, als Tropheen, en meer vercieringen, t'welck al
most zijn ghedaen binnen 25. dagen, waer van hy creegh, met zijn Broeder en
ander hulp, ses hondert gouden Croonen. Hier nae schilderde hy te
Bracciano voor Sigr. Paulo Giordano twee schoon Camers: in d'eene
d'Historie van Cupido en Psiche: in d'ander, die van anderen
begonnen was, Historien van Alexander Magnus. Noch te Room voor M.
Stefan del Bufalo, in zijn hof by Fonteyne de Trievi, maecte hy de
Muses, by de borne Castalio, dat een schoon werck is. Hier nae
trock Taddeo ontboden tot Orvieto met Federigo, daer sy in
de Kerck sommigh werck lieten onvoldaen door sieckte. Taddeo quam te
Room, daer hy eenighe dingen ghedaen hebbende, nam aen voor den Cardinael
Farnese te schilderen een schoon heerlijck nieuw Paleys tot
Caprarola, en hadde van den Cardinael twee hondert gouden Croonen
s'Iaers voor pensioen. Taddeo met Federigo doende wesende in't
Paleys van Araceli, worde gesonden t'Vrbijn, te conterfeyten de
Dochter van den Hertogh, Virginia, die trouwen soude met Sigr.
Federigo Borromeo, t'welck Taddeo seer constigh en wel dede: en eer
hy noch van daer quam, teyckende verscheyden dinghen tot een gheheel Credence,
die den Hertogh in Castel Durante al liet maken van aerde, Taddeo
te Room comende, presenteerde t'Conterfeytsel aen den Paus, welck hem wel
behaeghde: maer zijn Heylicheyts beleeftheyt was soo groot, dat den armen
Schilder niet alleen voor zijnen arbeydt niet en worde gegheven, maer oock zijn
reysgelt betaelt. T'gheschiede hier nae, dat Paus Pius de vierde de sale
Regi wouw voldaen hebben: des nae veel twist tusschen Volterra en
Salviati, als elder verhaelt is, worde gheschreven nae Florencen om
Vasari, die hem antwoordende beleefdelijc ontschuldichde, met des Hertoghs
sale, de welcke drymael meerder is, die hy te doen hadde: des den
Cardinael Emulio, uyt last van den Paus, heeft dit werck verscheyden
Schilders gegheven. De twee meeste Historien hadde te maken eenen Ioseph
Porte, discipel van Salviaet: Ieronimo Sermonetta oock een van de
meeste, en een ander cleene: Horatio Bolognees oock een cleene: Livio
da Furli oock sulck eene: Ioan Baptista Bolognees oock een van de
cleene: soo dat Taddeo hem hier vondt buyten ghesloten, om dat van zijn
misgunners den Cardinael Emulio was wijs gemaeckt, dat Taddeo een
was, die niet nae eere, dan nae winninghe stondt. Taddeo evenwel socht
door Farnese hier noch incomste te hebben: maer den Cardinael antwoorde,
hem ghenoech te hebben aen zijn werck te Caprarola, en dat hem niet
behoorlijck en docht, dat zijn werck soude nae blijven om den trots en twist
der