Schilders: en als men yet fraeys maeckt, de wercken zijnt, die
de plaetse vermaert maken, en niet de plaetsen het werck. Niet teghenstaende
dit, maeckte Taddeo soo veel door ander aen den Cardinael Emulio,
dat hem worde gegheven te maken een van de minste Historien boven een poort,
niet mogende door bidden oft ander middele, een van de groote ghecrijgen te
doen: want Emulio hiel t'werck dus slepende, meenende dat Ioseph,
Salviati discipel, al d'ander soude overtreffen, en dat al t'ander dingen
soude moeten afgesmeten worden, en hy alles dan alleen (als den besten wesende)
voldoen. Doe nu alle dese voornoemde hun werck hadden goelijcks voldaen, so
quam den Paus, en begeerde alle ding te sien: dus alles ontdeckt wesende, so
sagh den Paus met zijn Cardinalen, en ander Const-verstandige, dat hem
Taddeo boven alle d'ander seer wel ghedregen hadde: des beval den Paus
Emulio, dat hy Taddeo een groote Historie liete maken: des worde
hem besteedt t'eynde, daer de poort is van de Capelle Pauline, alwaer hy
als doe begon, maer niet en voleynde, voor dat den Paus overleedt, en dat alle
steygheringen wech mosten om de conclave. Op desen tijdt onder ander maeckte
Taddeo een seer schoon Tafel van eenen dooden Christus, met
Engelen die weenen, en toortsen hebben, daer het licht van comt. Hier nae
wrocht Taddeo in de Capelle voorseyt van S. Marcello, in welck hy
een Tafel maeckte van de bekeeringe Pauli, daer hy verschrickt van
t'Peerdt light ghevallen, door de claerheyt die van Christo comt uyt den
Hemel onder een deel Engelen: desgelijcx zijn ooc heel van hun selven en
verbaest de krijchsknechten: dese Tafel is van olyverwe. Daer zijn op't nat van
hem noch Historien Pauli: een, daer hy de slanghe van zijn handt in't
vyer werpt, daer ooc een deel Schippers schier al naeckt zijn doende aen't
Schip: een ander Historie, daer Paulus den doot ghevallen Iongeling
verweckt: oock daer hy eenen Creupelen geneest, en daer hy den Toovenaer blindt
maeckt: dit is al t'samen een seer uytnemende werck: maer van
Taddeo onvoldaen blijvende dees Capelle, is naer zijn doot van
Federigo voldaen. Taddeo maeckte eenige Tafelen van olyverwe, die
door den Ambassadoor aen den Coning van Vrancrijck ghesonden
waren. Daer nae voleynde hy de sale van Farnese, die Salviati
stervende onvolmaeckt liet. Hier van worde Taddeo over Room van quade
tongen gelastert, dat zijn dingen niet so goet en waren als des Salviati
t'welck hy onschuldighde, dat het zijn Iongers maer met zijn teyckeninge en
hadden ghedaen. Den Cardinael besteedde Taddeo noch de groote Sale in
dat selve Paleys, daer Taddeo lustigh toe was, om daer zijn vermoghen in
de Const te toonen. Hem quam noch op de handt een Capelle in Trinita, en
hadde onder handen dat groot werck tot Caprarola, des ontboodt hy
zijnen broeder Federigo van Venetien. Maer gelijck niet ter Weerelt
verstandich is, werden dese wercken ten deele belet, overmidts de doot van den
Paus Pius de vierde, en den Cardinael S. Agnolo Farnese.
Ondertusschen rieden Taddeo vrienden, dat hy hem soude geven tot
Houwlijck, om te beter te mogen huyshouden: maer hy ghewent wesende zijn
vrijheyt te gebruycken, vreesde, als hy een Vrouwe in huys brocht, met eenen in
huys te brengen duysent moeyten en sorgen, gelijck veel ghebeurt, des hy hem
daer noyt toe begheven wilde. Hier nae begaf hy hem te Trinita, te maken
de Capelle voor den Aertsbisschop van Corfu, daer Pierijn del
Vaga het welfsel voor den Cardinael Santi Quattro ghedaen hadde, en
van buyten eenige Propheten, en kinders met s'Cardinaels wapen.