Clinck-Dicht.
Der iongher oudt verstandt Minervigh heeft verclaert
De duyster vindingh oudt, door t'cloeck Natuers vereenen,
Als reden, arbeydt, wil: soo dat nu gantsch verdweenen
De wolcke duystrigh is, die meest elcx oogh beswaert.
Sulcx grondigh claerlijck blijckt aen t'recht ghebruyck en aerdt,
Van t'geen ons Mander vriendt heeft van zijn kindtsche beenen
Bearbeydt en beploeght, door doornen scherp en steenen,
Voor elck Const-liever vroet: want hy ons schenckt t'vermaert
En nut Verander-Boeck Ovidî in ons tael,
Tot voordeel van de Ieught, end' ouden, die den strael
Van Schilder-const en Dicht beschijnt, en sal beschijnen.
Dies eeuwigh van dees gift zijn lof als Hemel hoogh
Onsterflijck blijven sal: want die tot vordringh d'oogh
Heeft op t'ghemeene best, hoe soud' diens naem verdwijnen?
Elck toon betringh.
I. Detringh.
Clinck-Dicht.
Op het Verander-Boeck van Ovidius Naso, uytgheleyt Door
C omt nu ghy, die tot nu noch noyt en hebt verstaen,
A ls ghy Poëts gheschrift hebt sitten overlesen,
R echt hun beschrijvens sin, end' hebt hun dies mispresen,
E durven hun verhael als beusel-schrift versmaen.
L eest nu t'Verander-Boeck uyt Nasôs schriften saen
V an Mander uytgheleyt met claer verclaer by desen,
A lsoo men moet verstaen veranderingh en wesen,
N atuer end' eyghenschap van elck al claer ontdaen.
M erckt dat dit uytlegh is tot u verstandts vermeeren,
A ls rechten middel goet, om recht verstaen te leeren.
N iet slechts Ovidî schrift, maer yeders wiens het zy.
D en middelghever danck wilt danckelijck toekeeren,
E n kent dat hy hier door u leert tot uwer eeren
R echt alle dingh verstaen, eer ghy dat oordeelt vry.
In liefde ghetrouwe.