quam: want hy vercleedt comende onder de jonghe Dochteren, werdt lichtlijck gherekent oock een van hen gheselschap te wesen: maer ter wijlen den ellendigen Ionghman anderen bedroogh, en meest hem selven, geschiedet, dat hy in geselschap van zijn alderliefste, en veel ander schoon Iongvrouwen van* Athenen was gaen wandelen buyten der Stadt ter kermis, tot d'Offerhanden van Ceres Eleusina, werdt hy met dit zijn geselschap daer metter haesten overvallen, en ghevangen wegh genomen, van eenen hoop woeste felle Zee-roovers. Dese daer naer wat verre, en een deel mijlen van Athenen vertrockende wesende, waren seer vrolijck om hunnen roof, en daer mede in eenighe heymelijcke plaetse wesende, daer sy dochten wel te wesen versekert, hebben sy neder sittende hem gherust, en van t'onghemack der Zee door de langhe vaert, en de vermoeytheyt van desen tocht, waren heel vermoeyt, en begaven hun tot slapen, niet seer erghen voor besorght, om dat het maer en waren (soo sy meenden) al jonghe versaeghde Maeghden. Doe heeft Hymenaeus zijn Manlijck ghemoedt, en de liefde verweckt, d'oorsaeck, en gheleghen tijdt waer te nemen, te verlossen zijn Vrijdster, en alle dees gheroofde jonghe Dochters: en nemende van dese Roovers gheweyr, heeft dus slapende alle omghebracht, en vermoort, eer datter een wacker is gheworden. Doe hy nu dese Ionghvrouwen verlost, en weder hadde ghebracht in een wel versekerde plaetse, hy keerde weder in de Stadt, belovende die van Athenen, hun verloren Dochteren weder te leveren, soo verre, oft indien sy hem wilden doen hebben, oft geven tot een Huysvrouwe een onder hen allen, die hy eenighlijcken hertlijck beminde: het welck hem geern bewillight wiert: want yeder docht, dat hyse wel hadde verdient. Aldus dan vercreegh Hymenaeus de jonge schoon Ionghvrouwe, die hy seer ghewenscht hadde en begeert: nae de feestlijcke en vrolijcke Bruyloft, leefde hy met haer al zijn leven met goeden voorspoet, en geluck: ter oorsaken dan dat door desen dees Maeghden waren verlost, en dat zijn so seer begheert Houwlijck geluckighen uytgang hadde, hebben sy in ouden tijt in den Bruyloften menichmael zijnen naem ghenoemt, en herhaelt, seggende, oft roepende, Hymenaeus, Hymenaeus, ghelijck tot een gheluckigh teecken, en wenschende den houwlijckenden t'geluck van Hymenaeus. Dit was een wijse, en een ghemeen ghebruyck by den Griecken, gelijck de Romeynen in hun Bruyloften riepen, Thalassus: welcken Thalassus een cloec Hooftman wesende, wert toebracht een seer schoon Maeght der Sabinen, in den roof der Vrouwen, en al brenghende riepen de Krijghsknechten, tot Thalassus, tot Thalassus, daer sy* seer welcom, en te Wijve genomen wiert, en dit houwlijck was oock tot den eyndt voorspoedigh, daerom wiert Thalassus in de Roomsche Bruyloften aengheroepen. Dus Hymenaeus by den Griecken in den Bruyloften soo veel aengheroepen wesende, wert ghehouden te wesen den Godt der selver, ghelijck Iuno de Godinne daer van was, om dat door de maticheyt, en goedertierenheyt der locht, de Houwlijcken gheschieden, niet soo heel om datse de Godinne is van den rijckdom, daer veel Houwlijcken om geschieden. Met Hymen* oft Hymenaeus wordt oock noch ghemeent, d'oorsaeck des Maeghdelijcken naems. Nu dit Houwlijck van Thereus en Progne, was van dese twee overste der Bruyloften niet bewillight. D'Eumenides hebben wy in't vierde Boeck uytgheleyt: doch in dees Bruyloft hielden sy de keerssen oft Toortsen, niet der blijschap, maer des drucx: met dese Toortsen hadden de Heydenen veel te