den,
nam de Stadt Gnosen in, daer hy voor de poorten van het Dool-hof in eenen strijdt Deucalion met zijnen aenhang versloegh, soo dat Ariadne zijn suster self s'Landts, oft des Rijcx saken most by der handt nemen: doe verdroegh hem Theseus met haer, dat hy d'Atheensche ghevangenen los hadde, en Creta met Athenen in goeden vrede, met bespreck, dat de Cretische nemmeer den krijgh weder aenvangen souden. Dus zijn van dees oude dinghen veelderley* vertellinghen: doch om eyndighen, zijn eenighe die hier noch by voeghen, dat nae de voorverhaelde doot van den Minotaurus, Theseus met hem nemende Ariadne, oorsaeckster van zijn verlossinge, quam met haer in't Eylant Naxos, anders gheheeten Dia, oock Dionysa, om den overvloedt der Wijngaerden, die daer zijn: alwaer Theseo in droom van Baccho bevolen was, Ariadne daer te laten voor hem, soo dat hy ghehoorsaem wesende, haer slapende verliet, en is heymlijck van daer wegh gevaren, so dat haer Bacchus trouwde. Sommighe segghen, dat haer Theseus te lande bracht in Cypers Zee-sieck, en op t'uyterste swaer, en alsoot grooten storm was, waer door hy daer moest aencomen, en gaende weder in zijn Schip om dat te helpen redden, ist tegen zijnen danck ter Zee-waert in, en henen ghevaren: maer Theseus daer wederkeerende, vondt haer begraven, zijnde ghestorven in arbeydt, sonder baren. Theseus gaf daer een deel gelt, datmen Iaerlijcx dienst over haer dede. Noch wort vertelt, dat Theseus met den anderen Atheensche gevangenen te Creta comende, Minos hem verweet geen soon van Neptunus te wesen: want (seyde hy) al wierpe ick een Iuweel in de Zee, ghy soudet my niet connen weder doen hebben, en wierp met eenen zijnen ring in den grondt der Zee, stracx Theseus nae springende, werdt van een deel Dolphijnen opghenomen, en ghebracht tot den Nereïdes, door welcker toedoen hy den ringh vercreegh, en van Amphitrite* een Croone, welcke Neptunus tot ghedachtnis hier van, bestelde plaetse by den Sterren. Nu om corten, Theseus comende uyt Creten, quam te Delos, daer hy Offerhande dede in Apollons Kerck. Doe bestondt hy met zijn ghesellen te danssen eenen dans, dien de Delosche lange tijdt daer nae hebben gheoeffent: hy hiet de Kraen, en hadde veel krincken, keeren, en omkeeren, tot naebootsinge van den Dool-hof. Doe nu Theseus begon te genaken Attica, was met den zijnen so vrolijck, dat hy en zijnen Schipper vergaten op t'schip te stellen het witte seyl, waer mede sy AEgeo hadden belooft treecken te doen, alst hun wel waer gegaen: den welcken van verre siende noch het swarte seyl, geen hope meer hebbende zijn soon meer te sien, was soo mistroostigh, dat hy sich selven van een hooge Clippe, daer hy op was, van boven neder wierp, en doodde aldus hem selven. Theseus na zijn vaders doot verliet zijn heerschappije, en maeckte van Athenen eenen vryen ghemeenen staet, stelde in veel goede Wetten, en maeckte op zijn ghelt eenen Stier, tot gedachtnis van den Stier van Marathon, oft van den Hooftman Taurus. Eyndlijck nemen zijn ondanckbaer Borgers een ander Coningh, en verwierpen Theseum: des hy vertrock, comende te Scyaros, een Eylandt, daer hem Landtschappen toe quamen, en meender vrienden vinden, quam hy by Lycomedes den Coningh van't Eylandt, vraghende nae zijn Landen, om daer te woonen, oft (soo eenighe meenen) begheerende hulp teghen die van Athenen. Den Coningh ontfing hem met een vriendtschijnigh ghelaet, en leyde hem op een hooghe Clip, als om hem zijn Landen van daer te toonen, en stack hem van boven neder, dat hy