doot ghevallen, en soo verradelijck omghebracht is gheworden. Nu om met vertellingen niet meer tijt door te brengen, hebben wy te sien, wat hoogh verstandt en leeringhe in dese dinghen omwonden, en verborghen ligghen. Ghelijck wy verhaelt hebben, Pasiphaë was de dochter der Sonnen, hier by sullen* wy verstaen, des Menschen Godtlijcke edel Siele: by Iuppiters soon Minos, sullen wy hier verstaen de deughtlijcke reden, waer by de Siele haer heeft te voegen, en in Houwlijck mede te verbinden, en altijt getrouwlijc den selven Echt t'onderhouden, haer vermijdende van overspel, dat is, haer tot der Weerelt en der selver lusten te begheven, waer door sy van den wegh der oprechtigheyt verleydt soude worden. Venus is dese dochter der Sonnen, onse Siele een schadighe en vyandighe partije, dewijle sy, te weten, onse Siele, door haer prickelinge, oft vleeschlijcke lusten, menichmael van de reden doet af keeren, en vervreemden, haer voeghende seer dwaeslijck tot den Stier, dat is, tot een onredelijck en beestlijck leven, daer den Mensch gescheyden van de reden, in vervalt, door welck vuyl overspel hy bevrucht zijnde, baert den Minotaurum, dat is, den Mensch werdt inwendich verduystert te volghen den Menschlijcken en vleeschlijcken wille, en te bedrijven een menichte van grove wanschapen oneerlijcke beestlijcke wercken, hebbende alle Godtlijcke en Menschelijcke Wetten in verachtinge, soo dat hy aldus beestlijck gheworden wesende, gheraeckt heel in den Dool-hof deser Weerelt, daer hy soo verstrickt,* bevlochten, omvanghen, en met soo veel cromloopende dwaelwegen der zonden omset is, dat hy ghelijck den Minotaurus ten lesten daer in vergaet, verderft, en dootlijcke straffe van Gode hem toegheschickt moet lijden, oft ten waer hem door besonder Godtlijcke ghenade (met het Dedalissche clouwen afghebeeldt) handtreyckinge en hulpe gheschiede: het welcke selden, jae nauw van duysenden een en ghebeurt, dat hy uyt den onbesuysden Dool-hof der inghewortelder zonden can vry comen, oft dat oude verharde schubbighe Slangh-huydt uyt ghetrecken, en comen tot de vernieuwinghe van een beter vroom eerlijck leven, en rechten wandel: Ghelijck het Theseo gheluckte, die met arbeydt en volherdighen strijdt, dit boos ghedrocht heeft overwonnen, en met t'clouwen, hem van Ariadne toeghelangt, uytcomste vonden heeft uyt desen verwerden Dool-hof. Recht oock alsoo behoeft den Mensch te bestrijden* en t'overwinnen zijn eyghen onredelijcke lusten, en volghen het clouwen oft rechten draed der redelijckheyt, om uyt de werre-wegen deser Weerelt op den wegh der gerechticheyt te comen, en tot een eerlijc redelijc leven, dat een uytnemende geluck is, daer toe te comen: want in geenen Dool-wegh der zonden, en is eenighen uytgangh, die tot eenighe soete rust des gemoedts toeleydende, oft brenghende is. Om voort te vervolghen onses Poeets vertellinghe van Ariadne, verlaten in't Eylandt Dia, en van Baccho omhelst, dit mach gheschiedischer wijse ghenomen worden, dat sy daer in dat Wijn-rijcke Eylandt, met den Wijn te veel drincken haer vergrijpende, droncken wesende in harden slaep, van Theseo wert verlaten, en dat Bacchus haer siende met zijn vrolijcke sap soo wel voorsien, haer te Wijve heeft ghenomen. Eenighe willen segghen, dat het was een Priester Bacchi, die haer tot hem genomen soude hebben. Hier is te mercken, dat een Vrouw-mensch, die haer licht van den dronck laet bevanghen, oock met eenen van de Venerische lusten licht can verwonnen worden, en daerom gaf haer Bacchus een Croone, welcke Vulca-