een natuerlijcke meeninghe, dat het is eenen Boom by den Sabei, die van der Sonnen crachtighe stralen daer ontsteken wort, en gelijck de Sonne den Vader is gheheeten van alle gewas, werdt versiert, dat Myrrha op haer Vader verliefde, dewijl de Sonne desen Boom verhittende doet splijten, daer dan uytspruyt, die costlijcke Myrrhe, de welcke dan baert Adonis, dat is, eenen soeten reucke, want Adonis is soet gheseyt. Eer wy nu tot Adonis Fabel comen, laet ons Atalanta voor nemen, en Hippomenes. Sonder lange vertellingen te maken, wy sullen verstaen en mercken aen dit gulden Appel rapen, datter geen dingh ter Weerelt soo crachtigh en is, om de ghestadicheyt, eerbaerheyt der Vrouwen te buygen, haer cuysch voornemen te breken, en haer reyn gemoedt, hoe crachtigh, bevlecken en beweghen, als het gout, Noordsterre des herten: want het schijnt oft yeders herte met den seyl-steen der begeerten bestreken zijnde, van dees blickerende Sterre wort aenghelockt en ghetrocken, en dat het menigh met Atalanta, in den loop verhindert, te weten, in de loopbane* der oprechticheyt: want om tijdlijck ghewins wille, worden de Menschen van den gierighen lust niet alleen ghedreven tot grooten arbeydt en commer: maer oock uyt den rechten wegh te loopen, tot seer diep in't veldt, van ghewelt, loghen, geveynstheyt, meyneedicheyt, ontrouwe, dieverije, roof, moort, en bedrogh. Ghelijck dese loopster diep in't veldt liep om t'goudt, en de eere der verwinners ghemiste: desgelijcx verliest menigh, om zijnen rijckdom meer en meer vermeerderen, so buyten sweeghs loopende, zijn eere en goede naem. Soo doen oock eenighe eerbaer Maeghden, en Vrouwen, die door giften verwonnen, en omgecocht wesende, worden heel onbeschaemt, en oneerlijck, datse ten lesten niet en letten op Godtlijck verbondt, oft eenighe heylighe Wetten: ghelijck als Atalanta, met haren Hippomenes, de heylighe plaetse van Cybele bevleckende, aenwijst, datse soo verre comen verblindt te wesen, en ghewendt tot een beestlijck wesen, gelijck dese twee in Leeuwen veranderden, datse qualijck af laten connen: doch ist gheluck, als sy noch in den waghen van de Goddinne der kuysheyt, in't jock des redens hen ondergheven, ghespannen, en de Godtlijcke Wetten onderworpen te worden, alsoo dees twee gheseyt worden in Cybelis waghen te zijn ghespannen gheweest. Keeren wy nu tot Adonis.
Van Adonis.
Adonis gheslachte is van onsen Poeet ghenoech beschreven: doch Lycophron maeckt hem den soon van Thias, en niet van Cinyras, den Coning van Cypers. Venus op hem seer verlieft wesende, was Mars haren ouden* Vryer soo toornigh op Adonis, dat hy een wilt Vercken verweckte, en stierde om Adonis te dooden: en alsoo haer Venus seer loopende, haestede Adonis te hulp te comen, quetste haer voeten in de Roos-boomen, waer van de Roosen, die eerst niet dan wit waren, zijn oock root gheworden. Venus en Proserpina beyde om te seerst be-Adonist waren verdraghen, hem ses Maenden by beurten te hebben. Dat zijn Moeder begeerde in Boom te zijn verandert, grootlijcx haer gemoedt gebeten voelende, van een bitter leerwesen over haer snoode en onwetlijcke bloedtschande, wijst aen de oorsaken, en beginselen van sulcke soo droeve uytcomsten heel te vermijden, oft te wijcken, op datmen eyndlijck zijn Siele niet en vindt jammerlijck door-boort en door-beten, van de scherp beschuldigende knaghende gedachten. By den jacht-lievenden Adonis,