Veldt-nymphe daer op t'landt, op hem seer verliefde, en hadde by hem twee kinderen. Ontrent desen tijt, bewees hy zijn moedicheyt, en vroomheyt: want des Conings Priami Vee gherooft, en ontdreven wesende, Paris dit te weet comende, vergaderde soo veel Herderen als hy mocht, vervolghde en versloegh den Rooveren, en bracht den roof wederom: waerom hy ghenoemt wiert Alexander, dat is Mensch-jagher gheseyt. Hy was oock vermaert,* te wesen van goeden gheest, en een oprecht Mensch, soo dat hy alle oneenicheden, die onder den Herders ontstonden, te neder leyde en slechtede, alsoo verhaelt is. Nae dat hy den Goddinnen gevonnist hadde, ist geschiet, dat Hector te Troyen steeckspelen, strijden, en worstelinghen, om prijs te winnen, liet uytroepen. Doe gaf den Herder, die Paris opgevoedt hadde, hem te kennen, dat hy niet en was zijn soon, gelijck hy hem wel hadde doen te verstaen tot doe ter tijdt: maer dat hy was den soon van Coningh Priamus en Hecuba. Hem radende te gaen, sonder hem bekent te maken, zijn macht beproeven met die ander Heeren: en indien het gheschiede, datmen hem om zijnen Boerschen Herderschen staet versmaedde, sy souden de bundselen, kints doeck, en ander litteyckenen, daer hy mede wech gebracht was, over geven, en hem also bekent maken. Hy volghde den raedt: hy quam tot Troyen, en worstelende met den Prince Hector, wierp hem cloecklijck ter aerden. Hector beschaemt en toornigh, dat sulcx van een Boer hem geschiedt was, was quaet genoech om den selven met zijn sweerdt te dooden: maer die verhaelde dingen ghetoont wordende, werdt gekent, en vriendlijck aengenomen onder den kinderen Priami.
Van Helena.
Van Helenae gheboort uyt het Swaen-ey, hebben wy verhaelt in't seste Boeck: doch meenen haer eenighe te wesen dochter van Tyndarus, Coningh van OEbalien, en van Leda. Ander seggen, datse was dochter van Nemesis, en dat Leda alleen haer Voedster is gheweest, en Iuppiter haer Vader. Dese Helena was soo uytnemende schoon, dat haer bevallijckheyt tot haer trock de liefde van alle de Princen van geheel Griecklandt. Alsoo dat sy al t'samen hun vergaderden ten Hove van den Coningh Tyndarus, om haer te Houwlijck te begeeren, en om te sien wie haer soude vercrijghen, alhoewel sy te vooren was ontschaeckt geweest door Theseus, by wien sy soude een kindt ghebaert hebben tot Argos, en soude daer nae haer twee Broeders, diese quamen begeeren, weder zijn ghegheven. Eenighe meenen, sy hadde by Theseum twee dochteren, Hermione, en Iphigenia, en noch ander: doch wederspreken ander dit, en seggen, dat sy Maeght wederom ghelevert werdt, het welck onsen Poeet oock ghetuyght in haren brief tot Paris, seggende, dat Theseus (hoe seer hy hem pooghde) noyt zijnen wile van haer en hadde, dan dat hy met gewelt eens haren mondt ghekust hadde, en werdt medelijdich met haer, en leverdese onghescheynt beleefdelijck wederom. Nu dewijl men wel voorsagh, dat wiese trouwen soude, niet en soude doen, dan hem selven over den hals halen veel afgonst, nijdt, en gheschil. En alsoo yeder doch hoopte, of sy hem te deel mocht worden: soo hebben dese jonghe Heeren al t'samen gesworen t'onderhouden de Wet, die Tyndarus, aengaende zijn dochter, hadde ghemaeckt: te weten, dat een yeghelijck soude al zijn vermoghen oft macht ghebruycken, om haer te beschermen, tegen die haer aen haer eere soude willen beschadigen,