Van Aiax, Oilei soon.
Aiax, den soon van Oileus, was gheboren in't Landtschap Locres, nu ter tijt Ozoli geheeten, niet wijt van Etolien: doch niet van Locres in Italien: dan is een Griecx Heer, en cloeck Krijghs-heldt geweest, die voor Troyen groote stoutheyt en gheweldt dede. Maer in de Troysche plunderinghe oneerlijck omgaende met Cassandra, als verhaelt is, heeft den toorn van Minerva en Apollo op zijnen hals gehaelt. Minerva vercreegh van haer Vader den Blixem, weerlichten, donderen, onwederen, draey-winden, en doncker wolcken, en hier mede ghewapent, heeft der Griecken reyse in't nae huys trecken grouwlijck beschadicht. Aiax Schip werdt van Minerva met den scheut eens Blixemstraels te gronde ghedreven, d'ander Schepen morselden op de rootsen, die daer nae Aiax Clippen gheheeten wierden. Aiax behielp hem met zijn stercke armen crachtlijck swemmende, dat hy op een Clip gheclommen wesende, soude t'leven behouden hebben, boven al dat hy soo misdadigh was, en hadde hy den Goden doe soo niet ghelastert, roepende luydstemmigh, dat hy hoe spijtigh en toornigh sy waren, noch ontcomen soude tegen hunnen danck. Waerom Neptunus vergramt, d'aerde dede schudden, treffende met den drytandt de Clip, dat hyse te gronde wierp, en Aiax lichaem alsoo ontsielde. Hier* sien wy, gelijck de Poeten veel aenwijsen, dat het een grouwlijck quaet is, dat sterflijcke Menschen Godt niet in eeren ghenoech en hebben: maer zijnen naem heerlijckheyt, en geweldt lasteren, niet bedenckende zijn almachticheyt, en s'Menschen gheleent heel swack vermoghen: En hoe haest de Godtlijcke straffende handt den vermeetlijcken sondaer te gronde can werpen.
Van Aiax den Telamonschen.
Desen Aiax is gheweest den soon van Telamon, Coningh van het Cretische Eylandt AEgina, waer van in't sevenste Boeck verhaelt, daer d'inwoonders van Mieren ghecomen, Myrmidones souden zijn gheheeten. Desen Telamon hadde te Wijve Priami suster Hesione, dochter van Laomedon. Telamon was den soon van Eacus, Iuppiters soon, die t'Miere volck ghecreegh, en een van den Hellen Richters is gheworden, soo in't verhaelde sevenste Boeck te lesen is. Desen Aiax is een uytmuntigh Krijghs-man gheweest voor Troyen, uytnemende sterck, groot ghestaltigh, en t'hooft langher als eenigh ander onder alle Griecksche Helden. Hy wierp Hector met eenen steen ter aerden, en dorst teghen hem uyt houwen, hy met den anderen Aiax wederstondt de heele Troyaensche macht, en beschermde de Griecksche Schepen, comende eyndlijck in tonghe-strijdt met den betraepten Vos, Vlysses, con niet teghen houden, soo dat hem de wapenen van zijnen Neef Achilles zijn ontwesen gheworden, sich selven van spijt doodende, als volght.
Eyndt des twaelfsten Boecks.