Ceres.
Ceres hadde eenen wagen, van Draken voort ghetrocken, in de handt een* fackel, en mancoppen, oock somtijts een sickel, daer van de verclaringhen zijn in d'Wtlegginghe Ovidij in't vijfde Boeck: was oock uytghebeeldt met een Peerden hooft, om datse in Meerie was verandert, doe Neptunus haer gheselschap hadde, als in't Verander-boecks uytlegh te sien is. Haer Peerdtsche mane oft hayr waren Slangen, en ander wilde Dieren, die om haren hals speelden: sy hadde een lang cleedt, en in d'een handt eenen Dolphijn, in d'ander een Duyf. By Ceres wort oock d'Aerde verstaen, en somtijts het Coren.
Pan.
Van den Geyt-voetighen hippelaer Pan, laet ick ghenoech zijn te hebben* gesproken, in't eerste Boeck van d'Wtlegginghe voor verhaelt: Als oock d'ander Goden, elck in hun plaetse mach daer van ghelesen worden. Wy moghen ons nu keeren tot den Dieren, en ander dingen, daer men yet mede can beteyckenen, oft aenwijsen.
Eyndt des eersten Boecks.