Wil dw machen ain gut fundamentum und ain assis dor auf man golt und silber legt daz es schon und glancz sey und werd Nim zw dem ersten cretam pellicarie daz ist chreyd dÿ chursner haben die chreid schol man vor hin beraitten man schol nemen hecht schupen und hecht gewayd von dem haubt und daz schol man underainander sieden in einem uberlauttern chachelein als lang uncz pis das trittal ein sied dar nach schol man dÿ prue nemen und schol seÿ seyhen durch ein raÿn tuchellein und reib dÿ vorgenannt chreid mit der fischen prue und tw es dan in ein mischel und la es hert werden und wen dw wilt ain fundament machen ze golt so nim der vorgenantt chreid alz groz sam ain hasselnus und reÿb dÿ gar wol auff ainem stain mit dem wazzer daz von aÿger chlar seÿ gemacht und reib dar under alz groze cinober alz ain arbais und salis armoniaci auch als ain arbais und dreÿ plumen saffrans daz es geleich golt gel werd daz reib alles gar wol underainander auff dem stain und tue es danne von dem stain in aÿn rayn mischelen und daz scholt dw temperiren in der dick alz ain rubrick und gehort zw vein golt ze gleicher weis so mag man auch silber dor auff legen on daz der saffran dor under chom Hie merck alzo schol man silber und golt (//f. 219v) auff legen in der vorgenantt golt varb und schreib auff daz pirmait waz du wollest und pesin vorhin wie praÿt der pubstain schol sein den dw wilt vergulden den pubstain vormir vorhin endleich wol mit einem plumbet und umbreis den pubstan mit der golt varb geleich und schlecht und schneid daz golt in der praÿt alz dÿ pubstan sein und nim ein pensel und necz den aÿn winick vor auf der zung und rur daz gschniten golt mit dem pensel vorn an an ainem end so hafft daz golt daran so surdz daz golt vor enpor daz hintten in der hang und fur daz auff dem pirmait hin pis auff den pubstab mitten so la daz golt senftichleichen nider saygen auf den pubstan so zeucht dÿ varb daz golt an sich dor nach kuch ain klain auff daz golt als vergulden nach eÿnander alz vil dw wollest und la daz wol trucken werden und wen es wol trucken wirt so wisch daz golt hubsleich umb und umb ab mit baum wollen dar nach nim ain hurneyn plat und und leg daz under daz vergolt dinck und nim aines wolfs zand oder eins huncz und likne daz golt senfftigleichen alz lang uncz es glancz genuck werd Hÿe merck daz man daz golt praitter schol schneiden den daz ist daz man schol vergulden. Daz ist ain fundament golcz und silbers nassz auff ze legen.