Die maniere van ovens te maken om colueren te backen van alle soerten. Ende hoemense backen sal
Eerst salmen het gelas in den eersten oven allenskens laten wel werm ende heet werden ende dan soo suldyt in den midden oven steken ende setten hem
in den moffel op oft over het gelas ende staken dan soo aan beyden syden
vanden oven, soo dat die lacye oft vlam[m]e al door de gaten vanden moeffel claer soo op het gelas slae. Ende ghy u monsters
daer by hebben om te siene wanneer dat het coluer genoech is gesmolten op het gelas ende soo nemet daer uut ende legget dan
inden derden oven, welc is den coel oven, ende latent daer inne af coelen ende dat suldy allenskens al achterwerts clouwen ende nemet
achter uut, ende altyts als het een uut gaet soo doet altyt een ander stuc in die stede tot dat ghy de stucken oft werck
al hebt gebacken.
Dese ovens al staen sy open dat is om datmen sien soude hoe
sy syn van binnen ghestelt. Maer anders behaaren sy al toe te wesen, anders dan gaten alsoo groot dat men die stucken vant gelas dat
ghy wilt backen dat men dat daer in mach legghen ende weder uut doen, maer nachtans moetmen stopsels hebben die men in die gaten sedt,
ende die behaaren oock daer in te passen ende die werden gemaeckt van
cleem ende haer oft hoij, ende met een cleyn gaetken in de midden om met een ijser uut ende in te sobben[?]. Maer ter syden aen den middelste oven moeten twee cleyn gaetkens wesen om in te staken dat het
vier berne aen beyde syden vanden moffel, soo spelt dat vier door die
gaetkens vanden moffel op het gelas soo dat de colueren smilten op het gelas. Ende den gront vanden oven, daer het gelas sal op ligghen, suldy maken van geleyers potbackers eerde tot pulver al
cleyn gemaeckt ende dat wel effen sy, ende daer legghet gelas op ende
dan soo stoockt tot dat de wysers wysen dat genoech is.
Ende wildy oock ghy macht den heert vanden oven maken van-
der seiver geleyers eerde, maekense als plaester ende overlegghen soo den heert daer mede dat hy wel pleyn sy ende effen ende laten
soo wel hert drooghen.
Noch moetty hebben een ijser lanc, eenen voet breet ende plat, al gelyc daermen het broot met inden oven schiet ende heet een schele ende die moet altyt ierst wel heet syn eer ghy het gelas
in oft uut doet.
Blau
Ende nu tot den verwen, soo suldy tot het blau nemen schoonen
smals met gomme water getempert ende daer mede geleijt het ghene dat ghy blau wilt hebben.
Pers
Ende dat ghy pers oft violet wilt hebben, suldy nemen schoon
wit glas ende pulveriseren dat ende nemen dan oock wel cleyn gepulveriseert magnesie ende doen in een lb. glas een once magnesie ende laet dit te samen smilten ende fineren ende dan weder cleyn gevreven ende doen als boven metten smals.
Groen
Dat ghy groen wilt hebben, so doet als boven, tot een lb. wit
glas suldy nemen een half lb. Rijoen cleyn gepulveriseert (men vindet
by de gheel gieters oft cloc gieters) ende noch een once coper slach, laet dit te samen smilten ende doet als boven, te weten cleyn gevreven ende dan met den gom water getempert ende soo op het gelas geleyt, alsoo voren verclaert is. Ende oft het groen te gras groen saghe soo suldy
int smelten wat saffers by doen oft smals, soo saelt na het blauw groen trecken.
Ghy sult nemen eenen steenen pot van dusdanigen faetsoene ende die wel geluteert rontsomme ende laten hem dan soo wel drooghen, by hem selven ist best. Ende dan moetty noch een cruycke hebben die wat grooter is, van dese fatsoene soo ghy hier siet, maer desen en derf niet geluteert syn, dan alsmense int werck stellen sal ende campt aldus int fatsoen.
Ende soo aan maleanderen geluteert ende dus op eenen eerden pot met eenen monde daer men het vier inne stockt, ende dit vier sal ierst 6 uren met cleyn vier gestockt werden ende daer na noch 6 uren met
sterkere viere, welc is te samen 12 uren, soo moet men stocken eert bereyt is.
Dit is de materie diemen hier toe besigen sal.
Nempt een lb. salpeter, een lb. coperose, een half lb. pluym aluyn. Dese dry suldy inden cleynen pot doen ende dan hem aen den grooten pot luteren, soo hier
boven staet, ende dan onder den cleynen potvier staken, soo boven v[er]claert staet. Dan doet dese potten vanden anderen ende doet het water dat inden grootsten
pot is gedistilleert in een peer gelas ende stoppet dicht toe, ende aldus ist bereijt. Vorts suldy nemen een onse fyn capelle silver ende slaen dat in platte
dunne stucken gelyc folie ende dan in cleyn stucken gesneden met eender
scheren oft mes. Ende dan nemt een once vanden voors.gedestilleerden
water in een peer gelaesken ende daer doet het silver dan in ende stoppet boven met den duijm toe ende houdet soo over het vier dat het lau werde,
ende soo werdet siende ende gheeft een roode coluere ende suldy ter stont swerte veselingen daer in den bodem sien, ende dit laet soo een urken conge-
leren. Ende aldus congeleert synd, soo maket weder wat werm, soo
sallet al water werden, soo nempt een eerden teylken ende doet daer water
in, ende werpt daer wat gemeyn souts in, ende daer soo giet dan het gesmolten silver in ende latet staen sincken, Den nempt noch een ander teijlken ende ghietet claer vanden ander in dat teylken, ende soo wasschet allenskens af tot dat ghy swert allene hebt, ende hout het
wit allene, dat is het silver ende het swart is het gout,
ende dit nu drooge sijnde soo nempt weder vanden voors gedistilleerden water ende doet dat weder op het seiver dat daer
bleven is.